امریکا پر اعتماد شکرنی،ایران کا دوبارہ آبنائے ہرمز بند کرنے کا فیصلہ

ایران کی فوج نے اعلان کیا ہے کہ آبنائے ہرمز سے گزرنے والے جہازوں کی آمدورفت پر پابندیاں دوبارہ نافذ کی جا رہی ہیں۔ ایرانی حکام نے اس اقدام کی وجہ امریکا کی جانب سے جنگ بندی کے باوجود بار بار اعتماد شکنی اور وعدہ خلافی کو قرار دیا ہے۔

ایرانی میڈیا رپورٹس کے مطابق ایرانی مسلح افواج نے کہا ہے کہ آبنائے ہرمز سے گزرنے والے جہازوں پر مکمل نگرانی قائم کر دی گئی ہے اور اگر مبینہ بحری ناکہ بندی جاری رہی تو اس راستے سے گزرنے والی بحری نقل و حرکت کو غیر مؤثر تصور کیا جائے گا۔

اس سے قبل ایرانی وزیر خارجہ عباس عراقچی نے سوشل میڈیا پلیٹ فارم ایکس پر کہا تھا کہ آبنائے ہرمز ٹریفک کے لیے کھلی ہے، تاہم چند گھنٹوں بعد سرکاری میڈیا نے نئی پابندیوں کی تصدیق کر دی۔دوسری جانب امریکی صدر ڈونلڈ ٹرمپ نے واضح کیا ہے کہ ایرانی بندرگاہوں پر بحری ناکہ بندی اس وقت تک برقرار رہے گی جب تک تہران کے ساتھ مکمل معاہدہ نہیں ہو جاتا۔

دونوں ممالک کے درمیان مذاکرات کا پہلا دور گزشتہ ہفتے اسلام آباد میں ناکام ہونے کے بعد یہ واضح نہیں کہ آئندہ مذاکرات کب اور کہاں ہوں گے۔

ایرانی فوج کے ترجمان نے کہا کہ تہران نے محدود تعداد میں آئل ٹینکرز اور تجارتی جہازوں کو گزرنے کی اجازت دی تھی، لیکن امریکا مبینہ طور پر ناکہ بندی کے نام پر بحری قزاقی اور جہازوں کی غیر قانونی روک تھام جاری رکھے ہوئے ہے۔ترجمان کے مطابق جب تک امریکا ایرانی بندرگاہوں سے آنے اور جانے والے جہازوں کی ناکہ بندی ختم نہیں کرتا، آبنائے ہرمز ایرانی افواج کے سخت کنٹرول میں رہے گی۔