میو ہسپتال میں جعلی ڈاکٹر اور پولیس افسر بن کر لوٹ مار کرنے والا ملزم گرفتار

میو ہسپتال میں خود کو ڈاکٹر اور اعلیٰ پولیس افسر ظاہر کرکے شہریوں اور ہسپتال کے عملے سے رقوم بٹورنے والا نوسرباز گرفتار کرلیا گیا۔

ہسپتال انتظامیہ کے مطابق ملزم خود کو پروفیسر ڈاکٹر عمر حسن اور نیورو سرجری کا سربراہ ظاہر کرتا تھا، جبکہ کنگ ایڈورڈ میڈیکل کالج سے 1996ء میں گریجویشن کرنے کا بھی دعویٰ کرتا رہا۔

ملزم ہسپتال کے اندر خود کو ڈی آئی جی پولیس، ڈائریکٹر سرویلنس پنجاب اور ڈائریکٹر سرویلنس فیڈرل بھی ظاہر کرتا رہا۔ جعلی شناخت اور اعلیٰ سرکاری و طبی عہدوں کا دعویٰ کرکے اس نے میو اسپتال کے ڈاکٹرز اور ملازمین سے رقوم بٹوریں۔

میو ہسپتال انتظامیہ اور سیکیورٹی سرویلنس ٹیم نے کارروائی کرتے ہوئے ملزم کو گرفتار کرلیا، جس کے خلاف مقدمہ بھی درج کرلیا گیا ہے۔

ہسپتال انتظامیہ کے ترجمان کے مطابق متاثرہ افراد تحریری درخواست جمع کرا سکتے ہیں، شکایت کنندگان کی شناخت اور معلومات مکمل طور پر خفیہ رکھی جائیں گی جبکہ انہیں ہر ممکن انتظامی اور قانونی معاونت بھی فراہم کی جائے گی۔