بدھ، 18 نومبر، 2026
Baaghi TV Logo
ٹرینڈنگ

معاشرے کی اصلاح میں قلم کا کردار، تحریر: مبراء عبدالقیوم

نقطہ نظر
mubarra qayoum

کسی بھی معاشرے کی تعمیر و ترقی کا انحصار صرف بلند عمارتوں، وسیع سڑکوں اور جدید سہولتوں پر نہیں ہوتا، بلکہ اس کی اصل پہچان وہاں بسنے والے انسانوں کے کردار، اخلاق اور سوچ سے ہوتی ہے۔ جب معاشرے میں سچائی کی جگہ جھوٹ، انصاف کی جگہ ناانصافی اور احساس کی جگہ خود غرضی لے لے تو محض ظاہری ترقی اس کے زوال کو نہیں روک سکتی۔ ایسے حالات میں قلم ایک ایسی قوت بن کر سامنے آتا ہے جو انسانی سوچ کو بیدار کرنے اور معاشرتی رویوں کو بدلنے کی صلاحیت رکھتا ہے۔ قلم بظاہر ایک معمولی سا آلہ ہے مگر اس کے ذریعے لکھے گئے الفاظ صدیوں تک زندہ رہتے ہیں۔ تلوار جسم کو زخمی کرتی ہے، لیکن قلم ذہنوں میں سوال پیدا کرتا ہے۔ تلوار کے ذریعے مارا تو جا سکتا ہے مگر قلم کے ذریعے خاموش ضمیروں کو آواز دی جا سکتی ہے۔ یہی وجہ ہے کہ تاریخ میں بڑے بڑے انقلابات کے پیچھے کسی نہ کسی صاحبِ قلم کی فکر اور تحریر ضرور موجود رہی ہے۔

اسلام نے بھی قلم اور علم کو غیر معمولی اہمیت دی ہے۔ قرآن مجید کی پہلی وحی میں اللہ تعالیٰ نے فرمایا: "جس نے قلم کے ذریعے علم سکھایا، انسان کو وہ کچھ سکھایا جو وہ نہیں جانتا تھا۔" (سورۃ العلق: 4-5)

یہ آیات اس حقیقت کی طرف رہنمائی کرتی ہیں کہ علم کی ترسیل اور انسانی شعور کی آبیاری میں قلم بنیادی اہمیت رکھتا ہے۔ ایک باشعور قلم کار اپنی تحریر کے ذریعے نہ صرف معلومات فراہم کرتا ہے بلکہ قاری کو سوچنے، سمجھنے اور اپنے رویوں کا جائزہ لینے پر بھی آمادہ کرتا ہے۔ آج ہمارے معاشرے کو جن مسائل کا سامنا ہے، ان میں جھوٹ، رشوت، عدم برداشت، طبقاتی تفریق، ناانصافی، گھریلو تشدد اور اخلاقی زوال نمایاں ہیں۔ ہم ان مسائل پر گفتگو تو بہت کرتے ہیں مگر ان کی وجوہات کو سمجھنے، ان کے حل کے لیے عملی کوشش کرنے سے گریز کرتے ہیں۔ یہاں قلم کار کی ذمہ داری شروع ہوتی ہے۔ اسے محض برائیوں کی نشاندہی نہیں کرنی بلکہ ان کے اسباب بھی واضح کرنے چاہئیں۔ اسے ایسے سوال اٹھانے چاہئیں جو لوگوں کو اپنی ذات، اپنے رویوں اور اپنے اجتماعی کردار پر غور کرنے پر مجبور کر دیں۔ تاہم اصلاح کا دعویٰ کرنے والے قلم کار کو یہ نہیں بھولنا چاہیے کہ اس کا اپنا کردار بھی اس کی تحریر کا حصہ ہوتا ہے۔ اگر کوئی شخص کاغذ پر سچائی، انصاف اور برداشت کی تلقین کرے، لیکن عملی زندگی میں خود ان اصولوں سے انحراف کرے تو اس کے الفاظ اپنی تاثیر کھو دیتے ہیں۔ قلم کی حرمت اسی وقت برقرار رہ سکتی ہے جب اس کے پیچھے ایک بیدار ضمیر اور دیانت دار سوچ موجود ہو۔

موجودہ دور میں سوشل میڈیا نے قلم کی رسائی کو غیر معمولی وسعت دے دی ہے۔ اب ایک تحریر چند لمحوں میں ہزاروں لوگوں تک پہنچ سکتی ہے، لیکن اس سہولت کے ساتھ ایک بڑا امتحان بھی جڑا ہوا ہے۔ بغیر تحقیق خبریں پھیلانا، کسی کی کردار کشی کرنا، ذاتی اختلافات کو تحریر کا موضوع بنا کر تضحیک کرنا اور نفرت انگیز مواد کو فروغ دینا بھی قلم ہی کے غلط استعمال کی صورتیں ہیں۔ ہمیں سمجھنا ہوگا کہ اظہارِ رائے کی آزادی دوسروں کی عزتِ نفس مجروح کرنے کا اختیار نہیں دیتی ہے۔ خصوصاً نوجوان نسل کو مثبت مطالعے اور تعمیری تحریر کی طرف راغب کرنا وقت کی اہم ضرورت ہے۔ گھروں میں کتاب سے دوستی، تعلیمی اداروں میں مطالعے کا فروغ اور ادبی سرگرمیوں کی حوصلہ افزائی نئی نسل کی فکری تربیت میں اہم کردار ادا کر سکتی ہے۔ ایک اچھی کتاب انسان کو وہ تجربات عطا کرتی ہے جن کے حصول میں شاید پوری زندگی گزر جائے۔

یہ بھی حقیقت ہے کہ معاشرے کی اصلاح صرف لکھنے والوں کی ذمہ داری نہیں۔ قاری کو بھی اپنی سوچ میں وسعت پیدا کرنی ہوگی۔ اسے ہر تحریر کو اندھی تقلید کے بجائے تحقیق اور دلیل کی کسوٹی پر پرکھنا ہوگا۔ اختلافِ رائے کو دشمنی سمجھنے کے بجائے سیکھنے کا موقع بنانا ہوگا۔