بدھ، 18 نومبر، 2026
Baaghi TV Logo
ٹرینڈنگ

تم بیٹھو نا میرے پاس، دسمبر کی دھند میں،تحریر: سمیرا اکرام

نقطہ نظر

دسمبر کی دھند میں سب سے پہلے یاد آنے والی چیز کوئی منظر نہیں ہوتا، کوئی خوشبو نہیں ہوتی، کوئی گانا نہیں ہوتا۔ سب سے پہلے یاد آتا ہے وہ شخص، جس کے بغیر سردی پوری نہیں ہوتی۔

دھند جب اترتی ہے نا، تو وہ صرف شہر کو نہیں ڈھانپتی، وہ دل کو بھی ڈھانپ لیتی ہے۔ لاہور کی گلیاں اچانک خاموش ہو جاتی ہیں۔ گاڑیوں کی روشنیاں دھندلی ہو جاتی ہیں، درختوں کے سائے غائب ہو جاتے ہیں، اور ہوا میں ایک عجیب سی نمی آ جاتی ہے۔ ایسی شام میں دل ایک ہی ضد کرتا ہے۔ کوئی پاس آ کر بیٹھ جائے۔ بس بیٹھ جائے۔ کچھ کہے بھی نہ، تو بھی کافی ہے۔

تم بیٹھو نا میرے پاس، دسمبر کی دھند میں۔

مجھے تم سے کوئی بڑا وعدہ نہیں چاہیے۔ مجھے تم سے یہ نہیں کہنا کہ تم ہمیشہ میرے ساتھ رہو۔ مجھے بس اس ایک شام کے لیے تم چاہیے ہو۔ اس دھند بھری شام کے لیے، جس میں میری سانسیں ٹھنڈی ہوا میں گھل رہی ہیں، اور میرا دل تمہارے نام کی دھڑکن پر چل رہا ہے۔

تمہیں پتا ہے دھند میں سب سے خوبصورت چیز کیا ہوتی ہے؟

جب دو لوگ پاس پاس بیٹھے ہوں، تو ان کے درمیان کا فاصلہ ختم ہو جاتا ہے۔ دنیا نظر نہیں آتی، لوگ نظر نہیں آتے، صرف وہ ایک چہرہ نظر آتا ہے جو آدھا دھند میں ہے، آدھا میری آنکھوں میں ہے۔ پچھلے دسمبر میں تم نے میرے ہاتھ سے چائے کا کپ لیتے ہوئے کہا تھا، "دھند میں چائے کا مزہ اس لیے زیادہ ہے، کیونکہ اس میں دو لوگوں کی گرمی شامل ہو جاتی ہے۔"

میں نے ہنس کر کہا تھا، "تم ہمیشہ ایسی باتیں کیوں کرتے ہو؟"

تم نے کہا تھا، "کیونکہ تمہارے سامنے ایسی ہی باتیں یاد آتی ہیں۔" آج پھر وہی دسمبر ہے۔ وہی چائے ہے۔ وہی چھت ہے۔ وہی دھند ہے۔ بس تمہاری کرسی خالی ہے۔ اور اس خالی کرسی کو دیکھ کر دل کہتا ہے، کاش ایک بار، صرف ایک بار، تم پھر آ کر یہاں بیٹھ جاؤ۔ دسمبر کی دھند میں تنہائی کا درد زیادہ گہرا ہوتا ہے۔ گرمیوں میں انسان بھیڑ میں اپنا درد چھپا لیتا ہے۔ لیکن دسمبر میں بھیڑ بھی دھند میں کھو جاتی ہے۔ پھر انسان اکیلا رہ جاتا ہے، اپنے دل کے ساتھ۔ اور دل اس وقت سب سے زیادہ اسی ایک شخص کو پکارتا ہے جسے اس نے سب سے زیادہ چاہا ہو۔

تم بیٹھو نا میرے پاس۔

میں تمہارے کندھے پر سر رکھنا چاہتی ہوں۔ تمہارے ہاتھ کو اپنے ہاتھ میں لینا چاہتی ہوں۔ اتنی ٹھنڈ میں تمہارے ہاتھ کی گرمی ہی میری سب سے بڑی خوشی ہے۔ مجھے سونے کے ہار نہیں چاہیے، مجھے بڑے گھر نہیں چاہیے، مجھے دنیا کی دولت نہیں چاہیے۔ مجھے بس تمہارے ہاتھ کی وہ گرمی چاہیے جو کہتی ہے، "میں یہیں ہوں، تم اکیلی نہیں ہو۔" دھند میں جب تم پاس بیٹھے ہو گے، تو میں تمہیں ایک راز بتاؤں گی۔ وہ راز جو میں نے کسی کو نہیں بتایا۔ وہ یہ کہ میں سارا سال تمہیں یاد نہیں کرتی۔ سچ میں نہیں کرتی۔ میں کام میں لگی رہتی ہوں، لوگوں میں لگی رہتی ہوں، زندگی میں لگی رہتی ہوں۔ لیکن جیسے ہی دسمبر آتا ہے، جیسے ہی پہلی دھند اترتی ہے، تمہاری یاد ایسے آتی ہے جیسے پہلی بارش کی خوشبو آتی ہے۔ اچانک، بے اختیار، پورے دل میں پھیل کر۔

تمہیں پتا ہے، محبت کا سب سے خوبصورت روپ کیا ہے؟

جب تم کسی کو پانے کی ضد نہ کرو، بس اس کے پاس بیٹھنے کی دعا کرو۔ میں تمہیں پانا نہیں چاہتی، میں تمہیں کھونا بھی نہیں چاہتی۔ میں بس چاہتی ہوں کہ تم تھوڑی دیر کے لیے میرے پاس بیٹھ جاؤ، اور اس دھند کو ہمارے درمیان سے گزرنے دو، ہمارے درمیان آنے نہ دو۔

اگر تم آ جاؤ نا، تو میں تم سے کوئی شکوہ نہیں کروں گی۔ میں نہیں پوچھوں گی کہ تم کہاں تھے، کیوں دور ہوئے، کیوں دیر کی۔ میں بس تمہاری آنکھوں میں دیکھوں گی۔ ان آنکھوں میں جس میں مجھے اپنا عکس نظر آتا ہے۔ دھند میں تمہاری آنکھیں اور زیادہ گہری لگیں گی، اور مجھے لگے گا کہ میں ان میں ڈوب رہی ہوں۔ اور ڈوبنا ہی تو محبت ہے۔ دسمبر گزر جائے گا۔ دھند چھٹ جائے گی۔ صبح دھوپ نکل آئے گی۔ لیکن یہ ایک شام، یہ ایک لمحہ، یہ تمہارا میرے پاس بیٹھنا، یہ ہمیشہ میرے دل میں زندہ رہے گا۔ لوگ کہتے ہیں محبت میں سب کچھ چاہیے ہوتا ہے۔ غلط کہتے ہیں۔ محبت میں بس ایک شام چاہیے ہوتی ہے، ایک کرسی چاہیے ہوتی ہے، اور ایک شخص چاہیے ہوتا ہے جو پاس آ کر کہے، "ہاں، میں آ گیا ہوں۔"

اس لیے میں آخری بار، اس دھند میں کھڑے ہو کر، دل سے کہتی ہوں۔

تم بیٹھو نا میرے پاس، دسمبر کی دھند میں۔