قسمت، تحریر:ردا فاطمہ اعوان

اکثر ٹھوکریں نصیب کی طرف سے نہیں لگتیں، ان میں ہماری اپنی کوتاہیاں، غلط فیصلے اور بے احتیاطیاں بھی شامل ہوتی ہیں۔ ہم زندگی میں کہیں نہ کہیں کوئی ایسا قدم ضرور اٹھاتے ہیں جس کے نتائج ہمیں بعد میں بھگتنا پڑتے ہیں۔ کبھی ہماری جلد بازی ہمیں مشکل میں ڈال دیتی ہے، کبھی کسی پر حد سے زیادہ اعتماد کرنا نقصان کا سبب بن جاتا ہے اور کبھی ہماری اپنی ضد ہمیں ایسے راستے پر لے جاتی ہے جہاں سے واپسی آسان نہیں رہتی۔ مگر افسوس کہ ہم اپنی غلطیوں کا جائزہ لینے کے بجائے فوراً قسمت کو قصوروار ٹھہرانا شروع کر دیتے ہیں۔

میں نے اکثر لوگوں کو یہ کہتے سنا ہے کہ میری تو قسمت ہی خراب ہے، اللہ نے میری قسمت میں صرف دکھ لکھے ہیں، مجھے زندگی میں کبھی خوشیاں نہیں ملیں، اللہ نے میرے ساتھ انصاف نہیں کیا۔ بعض اوقات تو انسان اپنے دکھوں کی شدت میں ایسے الفاظ بھی کہہ جاتا ہے جن کا اسے خود بھی احساس نہیں ہوتا۔ لیکن میرے خیال میں ہمیں اپنے الفاظ کے انتخاب میں بہت احتیاط کرنی چاہیے، خصوصاً جب بات اللہ کی ذات اور اس کے فیصلوں کی ہو۔

ہم کون ہوتے ہیں اللہ کے فیصلوں کو ناانصافی کا نام دینے والے؟ وہ ذات جو ہمارے ظاہر کے ساتھ ہمارے باطن سے بھی واقف ہے، جو ہماری ضرورتوں کو ہم سے بہتر جانتی ہے، جو ہمارے لیے ان راستوں کو بھی دیکھ رہی ہوتی ہے جن سے ہم خود بے خبر ہوتے ہیں۔ اللہ پاک کسی پر ظلم نہیں کرتا۔ اس کے ہر فیصلے میں کوئی نہ کوئی حکمت ہوتی ہے، اگرچہ ہماری محدود سوچ اس حکمت کو سمجھنے سے قاصر ہے۔

ہر مشکل قسمت کی خرابی نہیں ہوتی اور ہر ناکامی کسی بدقسمتی کا نتیجہ نہیں ہوتی۔ کبھی ہمیں اپنی غلطیوں سے سیکھنے کے لیے ٹھوکر کھانی پڑتی ہے، کبھی کسی خواہش کا پورا نہ ہونا ہمارے حق میں بہتر ہوتا ہے اور کبھی زندگی ہمیں ایسے امتحان سے گزارتی ہے جس کے ذریعے ہمارے صبر، حوصلے اور یقین کی آزمائش ہوتی ہے۔

ہم اکثر اپنی زندگی کا موازنہ دوسروں سے کرنے لگتے ہیں۔ کسی کے گھر میں خوشیاں دیکھ کر اپنے حالات پر افسوس کرتے ہیں، کسی کو کامیاب ہوتا دیکھ کر اپنی ناکامیوں کا ماتم شروع کر دیتے ہیں۔ ہمیں دوسروں کی زندگی کا روشن پہلو دکھائی دیتا ہے، مگر ان کے پیچھے چھپی آزمائشوں، محرومیوں اور قربانیوں کا اندازہ نہیں ہوتا۔ ہم صرف وہ دیکھتے ہیں جو ہمیں دکھایا جاتا ہے، یہ نہیں سوچتے کہ ہر مسکراتا چہرہ ضروری نہیں بے فکر بھی ہو۔

ہمیں یہ سمجھنے کی ضرورت ہے کہ زندگی ہمیشہ ہماری خواہشات کے مطابق نہیں چلتی۔ ہر چاہی ہوئی چیز کا مل جانا خوش نصیبی نہیں اور ہر ناپسندیدہ چیز کا زندگی میں آ جانا بدقسمتی نہیں ہوتا۔ بعض اوقات جس چیز کے نہ ملنے پر ہم برسوں روتے ہیں، وقت گزرنے کے بعد احساس ہوتا ہے کہ اس کا نہ ملنا ہی ہمارے حق میں بہتر تھا۔

اگر کسی کا دل دکھایا ہے تو معافی مانگیں، اگر کوئی غلط فیصلہ کیا ہے تو اسے تسلیم کریں، اگر کسی راستے کا انتخاب غلط ثابت ہوا ہے تو اپنی اصلاح کریں۔ زندگی میں بہتری صرف شکوے کرنے سے نہیں آتی، اس کے لیے اپنی کوتاہیوں کو پہچاننا اور انہیں درست کرنے کی کوشش کرنا بھی ضروری ہے۔

صبر کا مطلب ہاتھ پر ہاتھ رکھ کر بیٹھ جانا نہیں، بلکہ مشکل حالات میں اپنا حوصلہ برقرار رکھتے ہوئے درست سمت میں کوشش جاری رکھنا ہے۔ دعا کے ساتھ تدبیر، امید کے ساتھ محنت اور آزمائش کے ساتھ صبر بھی ضروری ہے۔ ہمیں ہر بار حالات سے ہار کر قسمت کو برا بھلا کہنے کے بجائے یہ سوچنا چاہیے کہ ہم ان حالات سے کیا سیکھ سکتے ہیں۔

میری نظر میں زندگی کا سب سے خوب صورت رویہ شکرگزاری ہے۔ شکر صرف خوشیوں میں ادا نہیں کیا جاتا، بلکہ مشکل وقت میں بھی اللہ کی نعمتوں کو یاد رکھنا شکر ہے۔ ہمارے پاس بہت کچھ ایسا ہوتا ہے جسے ہم معمولی سمجھ کر نظر انداز کر دیتے ہیں، حالانکہ وہی کسی دوسرے کی سب سے بڑی خواہش ہو سکتی ہے۔

زندگی کو صرف محرومیوں کی نظر سے دیکھنا چھوڑ دیجیے۔ اللہ سے شکوے کرنے کے بجائے اس سے رہنمائی، آسانی اور درست راستے کی دعا کیجیے۔ اپنی غلطیوں کو تسلیم کیجیے، کوشش جاری رکھیے اور جو چیز آپ کے اختیار میں نہیں، اسے اللہ کے سپرد کر دیجیے۔

کیونکہ ہر مشکل ہمیشہ نہیں رہتی، ہر رات کے بعد صبح ضرور ہوتی ہے۔ بس ضرورت اس بات کی ہے کہ ہم اپنے یقین کو کمزور نہ ہونے دیں۔

قسمت کو برا کہنے سے پہلے اپنے معاملات پر بھی نظر ڈالیں، حالات سے شکوہ کرنے سے پہلے اپنی کوششوں کا جائزہ لیں اور اللہ کے فیصلوں پر سوال اٹھانے سے پہلے اس کی عطا کردہ نعمتوں کو یاد کریں۔

شاید زندگی کا سکون اسی دن لوٹ آئے، جس دن ہم شکوے کم اور شکر زیادہ کرنا سیکھ جائیں۔

لَئِنْ شَكَرْتُمْ لَاَزِیْدَنَّكُمْ

" اگر تم شکر کرو گے تو میں تمہیں اور زیادہ دوں گا"

سورۃ ابراہیم، آیت 7

فرمان امام علی ع

"جسے شکر کی توفیق عطا ہوتی ہے وہ (نعمت میں) اضافہ سے محروم نہیں ہوتا"