تیل مہنگا، بھارتی ایئرلائنز کو پروازیں بند ہونے کا خدشہ


تیل کی بڑھتی ہوئی قیمتوں کے باعث بھارتی ایئرلائنز نے پروازیں متاثر ہونے اور بعض روٹس بند ہونے کا خدشہ ظاہر کر دیا ہے۔
رپورٹس کے مطابق انڈیگو، ایئر انڈیا اور اسپائس جیٹ کی نمائندہ تنظیم نے بھارتی حکومت کو خط لکھ کر فیول قیمتوں میں اضافے پر تشویش کا اظہار کیا ہے۔ خط میں کہا گیا ہے کہ بڑھتے اخراجات کے باعث نہ صرف روٹس ختم ہو سکتے ہیں بلکہ بیڑے کی فراہمی بھی متاثر ہو رہی ہے۔
‎فیڈریشن آف انڈین ایئرلائنز نے حکومت سے کرایوں کی حد ختم کرنے کا مطالبہ بھی کیا ہے تاکہ مالی دباؤ کو کم کیا جا سکے۔
‎ایئرلائنز کا کہنا ہے کہ موجودہ صورتحال برقرار رہی تو انہیں بھاری مالی نقصانات کا سامنا کرنا پڑ سکتا ہے اور بعض کمپنیاں مالی بحران کا شکار ہو سکتی ہیں۔
‎دوسری جانب پاکستانی فضائی حدود کی بھارتی پروازوں کے لیے بندش میں بھی توسیع کر دی گئی ہے، جس کے تحت بھارتی ایئرلائنز کے لیے پاکستانی حدود 24 اپریل تک بند رہیں گی، جس سے آپریشنل مشکلات میں مزید اضافہ ہو گیا ہے۔