بلوچستان میں سکیورٹی فورسز کی کارروائی، کالعدم تنظیم کے 6 دہشتگرد ہلاک

بلوچستان کے ضلع خاران میں سکیورٹی فورسز نے خفیہ اطلاعات کی بنیاد پر کارروائی کرتے ہوئے کالعدم تنظیم سے تعلق رکھنے والے 6 دہشتگردوں کو ہلاک کر دیا۔

سکیورٹی ذرائع کے مطابق خاران کے علاقے گروپ میں دہشتگردوں کی موجودگی کی اطلاع پر فورسز نے انٹیلیجنس بیسڈ آپریشن (آئی بی او) کیا۔ آپریشن کے دوران فورسز نے دہشتگردوں کے ٹھکانوں کو مؤثر انداز میں نشانہ بنایا جس کے نتیجے میں شدید فائرنگ کا تبادلہ ہوا۔ابتدائی اطلاعات کے مطابق کارروائی میں فتنہ الہندوستان سے وابستہ 6 دہشتگرد مارے گئے۔ سکیورٹی حکام کا کہنا ہے کہ علاقے میں مزید دہشتگردوں کی موجودگی کے خدشے کے پیش نظر کلیئرنس آپریشن جاری ہے۔ذرائع کے مطابق ہلاک ہونے والے دہشتگرد سکیورٹی فورسز اور عوامی تنصیبات پر حملوں میں ملوث تھے۔ سکیورٹی فورسز نے اس عزم کا اظہار کیا ہے کہ بلوچستان میں امن کو خراب کرنے کی کسی بھی کوشش کو ناکام بنایا جائے گا اور دہشتگردوں کے خلاف کارروائیاں جاری رہیں گی۔