پلی بارگیننگ شروع 2ارب 12کروڑ روپے کے عوض دوملزمان کی درخواست منظور

اسلام آباد: احتساب عدالت نے نوری آباد پاور کمپنی اور سندھ ٹرانسمیشن فنڈز میں خوردبرد کے معاملے میں ملوث ملزمان کی پلی بارگین درخواست منظور کرلی ۔

اسلام آباد سے ذرائع کے مطابق ملزمان سید آصف محمود اور سید عارف علی چیئرمین نیب جسٹس ریٹائرڈ جاوید اقبال کی طرف سے پلی بارگینگ کی درخواست منظور ہونے کے بعد احتساب عدالت میں پیش ہوئے۔

ان ملزمان کی طرف سے دی جانے والی پلی بارگیننگ کی درخواست چیئرمین نیب کے منظوری کے بعد احتساب عدالت نے منظور کر لی۔ تفتیشی افسر نے پلی بارگین کی رپورٹ احتساب عدالت میں جمع کرا دی۔

اس موقع پر جب جج احتساب عدالت نے استفسار کیا کہ بتائیں کتنے پیسے دینے کے لئے ملزمان تیار ہیں؟ کیا آپ اپنے خوشی سے پلی بارگین کر رہے ہیں؟ملزمان کی طرف سے جواب دیا گیا کہ وہ جی خوشی سے پلی بارگین کر رہے ہیں۔

جج محمد بشیر نے پھر پوچھا کسی کی جانب سے پلی بارگین کے لئے دباؤ تو نہیں ہے نہ؟ملزمان کی طر ف سے عدالت کو بتایا گیا کہ ان پر کوئی دباؤ نہیں ہے۔

نیب پراسیکیوٹر نے عدالت کو آگاہ کیا کہ دونوں ملزمان 2.12 ارب روپے دینے کے لئے تیار ہیں۔ دونوں ملزمان کاروبار میں برابر کے پارٹنر ہیں۔ ملزمان سید آصف محمود اور سید عارف علی نے سندھ حکومت کے افسران سے ملکر کرپشن کی۔