وہاڑی میں خطرناک ٹریفک حادثہ، 6 افراد جاں بحق

وہاڑی میں پش آنے والے خطرناک ٹریفک حادثے میں 6 افراد جاں بحق ہوگئے ہیں۔تفصیلات کے مطابق وہاڑی میں ٹبہ سلطان پور کے قریب کار اور کوسٹر کے درمیان ہونے والے تصادم سے 6 کار سوار موقع پر جاں بحق ہوگئے ہیں۔

ریسکیو ذرائع کا کہنا ہے کہ جاں بحق افراد میں کار سوار ایک بچی، ایک خاتون سمیت 4 مرد شامل ہیں۔ریسکیو ذرائع نے بتایا کہ کار ملتان سے وہاڑی جبکہ مسافر کوسٹر وہاڑی سے ملتان کی طرف جا رہی تھی۔

ریسکیو حکام نے بتایا کہ حادثہ میں 5 افراد زخمی بھی ہوئے ہیں تاہم زخمیوں کو آر ایچ سی ٹبہ سلطان پور اور نشتر ہسپتال ملتان منتقل کردیا گیا ہے۔

دوسری طرف تیز رفتاری کے باعث مزدا الٹنے سے 1 طالب علم جاں بحق جبکہ 12 زخمی ہوگئے ہیں۔

تفصیلات کے مطابق یہ افسوسناک واقعہ سرگودھا شہر کی تحصیل بھیرہ میں پیش آیا، جہاں تیز رفتاری کے باعث مزدا الٹنے سے 1 طالب علم جاں بحق جبکہ 12 طالب علم شدید زخمی ہوگئے ہیں۔

ریسکیو ذرائع کا کہنا ہے کہ طلباء مزدا پر سوار ہو کر کالج سے واپس جارہے تھے کہ اچانک تیز رفتاری کے باعث مزدا الٹ گیا۔

ریسکیو حکام نے بتایا کہ حادثے میں جاں بحق طالب علم کی شناخت رانا دلاور کے نام سے ہوئی ہے جبکہ زخمیوں میں اسامہ، قاسم، ابوذر، عبدالقیوم، مجیب الرحمن، گل محمد اور دیگر شامل ہیں۔

حادثہ مزدا ڈائیور کی غفلت اور تیز رفتاری کے باعث پیش آیا تاہم واقعے کے بعد ایسوسی ایٹ کالج انتظامیہ اور تھانہ بھیرہ پولیس موقع پر پہنچ گئی ہے