اداکارہ صبا قمر نے سوشل میڈیا پر ان پر حملے اور ان کی گاڑی پر پتھراؤ کی تردید کرتے ہوئے اپنے نام سے بنائے گئے جعلی اکاؤنٹ سے پردہ اٹھا دیا-
باغی ٹی وی : سماجی رابطے کی ویب سائٹ ٹوئٹر پر بنائے گئے اداکارہ صبا قمر کے جعلی اکاؤنٹ سے ٹوئٹ کی گئی تھی کہ افسوس کہ آج گھر جارہی تھی تو کچھ افراد کی جانب سے مجھ پر حملہ کیا گیا اور پتھراؤ کیا گیا میری گاڑی پر-ہم کیسی قوم ہیں جب اللہ کی ایک بندی معذرت بھی کر رہی ہے اپنی غلطی کی پھر بھی مجھے ٹارگٹ بنایا جارہا ہے۔
صبا قمر انسٹاگرام اسٹوری سکرین شاٹ
ٹوئٹ وائرل ہونے کے بعد صبا قمر نے اپنی انسٹاگرام اسٹوری پر اس ٹویٹ اور ٹک ٹاک کا اسکرین شاٹ شئیر کی اور صبا قمر نے اس ٹوئٹ کی وضاحت کرتے ہوئے کہا کہ ان پر کوئی حملہ نہیں کیا گیا اور یہ ٹوئٹ جعلی اکاؤنٹ سے کی گئی ہے۔
صبا قمر نے مداحوں سے جعلی اکاؤنٹس پر رپورٹ کرنے کی درخواست کرتے ہوئے کہا کہ میں ٹک ٹاک پر بھی نہیں ہوں میرے نام سے یہ تمام جعلی اکاؤنٹس بنائے گئے ہیں اور میں چاہتی ہوں کہ آپ سب اس کی رپورٹ کریں۔
واضح رہے کہ رواں ماہ 8 اگست کو سوشل میڈیا پر اداکارہ صبا قمر اور بلال سعید کے گانے کی میوزک ویڈیو وائرل ہوئی تھی جس میں وہ اپنے نئے گانے قبول کی شوٹنگ کے لیے تاریخی مسجد وزیرخان میں موجود تھے صبا قمر اور بلال سعید کیاس ویڈیو پر سوشل میڈیا صارفین اور معروف سیاسی و مذہبی شخصیات کی جانب سے حکومت سے کارروائی کرنے کا مطالبہ کیا گیا تھا جس پر دونوں فنکاروں نے وضاحت دیتے ہوئے لوگوں کی دل آزاری ہونے پر معافی مانگ لی تھی اور یقین دہائی کرائی کہ مسجد کے اندر فلمایا گیا حصہ ویڈیو سے ہٹادیا جائے گا-
