5 مغوی فنکاروں کو چھڑانے کے لیے آپریشن شروع ، ڈی ایس پی جاں بحق ، رینجرز بھی طلب کی جاسکتی ہے

شکارپور : یہ سندھ ہے جہاں ڈاکو دن دیہاڑے 5 فنکاروں کو اغوا کرکے لے گئے ، ان فنکاروں کو چھڑانے کے لیے پولیس نےآپریشن شروع کردیا ہے. اطلاعات کے مطابق ڈاکؤوں سے مقابلے کے دوران ڈی ایس پی راؤ شفیع اللہ جاں بحق ہوگئے، شکار پور میں فوک گلوکار جگر جلال سمیت5فنکاروں کی بازیابی کیلئے بڑے پیمانے پر آپریشن شروع کردیا گیا۔

ذرائع کے مطابق گڑھی تیغوں میں آپریشن کےدوران ڈاکوؤں سے فائرنگ کا تبادلہ ہوا، مقابلے میں دو ڈاکوؤں کے زخمی ہونے کی بھی اطلاعات ہیں۔واقعے کے بعد اے ایس پی سمیت پولیس کی بھاری نفری موقع پر پہنچ گئی، پولیس نے ڈاکوؤں کےخلاف بڑے پیمانے پر آپریشن کا آغاز کردیا۔یہ اطلاعات بھی گردش کررہی ہیں کہ پولیس کے ساتھ ساتھ رینجرز کو بھی ڈاکووں کے خلاف آپریشن کے لیے طلب کیا جاسکتا ہے.