پی ٹی آئی نے جان بوجھ کر مذاکرات کو نتیجہ خیز نہیں بننے دیا، طلال چوہدری

وزیر مملکت برائے داخلہ طلال چوہدری نے کہا ہے کہ اپوزیشن نے جان بوجھ کر مذاکرات کو نتیجہ خیز نہیں بننے دیا،گزشتہ چند برس کےدوران خیبرپختونخوا حکومت کی دہشت گر د ی کے خلاف اقدامات میں عدم دلچسپی رہی، جبکہ صوبائی حکومت نے سیکیورٹی فورسز کے ساتھ کیے گئے وعدے بھی پورے نہیں کیے۔

اسلام آباد میں نیوز کانفرنس میں طلال چوہدری نے کہا کہ مذاکرات کے آخری وقت وزیراعلیٰ خیبر پختو نخوا کی جانب سے جان بوجھ کر شرائط سامنے رکھی گئیں دہشتگردی سے متعلق معاملات پر اتفاق کے بعد سیاسی امور پر بات چیت آگے بڑھی تھی۔

انہوں نے کہا کہ مذاکرات کے پہلے روز وفاقی وزیر داخلہ نے دہشتگردی کے معاملے پر حکومت کا مؤقف پیش کیا,جبکہ خیبرپختونخوا حکومت کےنیشنل ایکشن پلان میں تعاون اوردہشتگردی کےخلاف اقدامات سے متعلق بھی حکومت نے اپنا مؤقف واضح کیا,گزشتہ چند برس کےدوران خیبرپختونخوا حکومت کی دہشت گر د ی کے خلاف اقدامات میں عدم دلچسپی رہی، جبکہ صوبائی حکومت نے سیکیورٹی فورسز کے ساتھ کیے گئے وعدے بھی پورے نہیں کیے۔

طلال چوہدری نے کہا کہ مذاکرات کے پہلے روز بنیادی معاہدے کے ڈھانچے پر قریباً اتفاق ہوگیا تھا، جبکہ سیاسی نکات اوردہشتگردی سے متعلق امور پر بھی اتفاق رائے ہوگیا تھا, اگلے روز مذاکرات جاری رکھنے پر بھی اتفاق کیا گیا تھا اپوزیشن رہنما پشاور گئے جہاں وزیراعلیٰ خیبرپختونخوا اور دیگر سینئر رہنماؤں سےملاقات کی ملاقات کے بعد اپوزیشن رہنماؤں نےدہشتگردی سے متعلق نکات پر دوبارہ یقین دہانی حاصل کی اور مذاکراتی ٹیم پارٹی کی رائے اور یقین دہانی کے بعد اگلے روز دوبارہ مذاکرات میں شریک ہوئی۔

وزیر مملکت کے مطابق مذاکرات سے ایک رات قبل وزیر داخلہ نے اپوزیشن رہنماؤں کو فون کرکے خیبر پختونخوا حکومت کے نمائندے یا وزیراعلیٰ کو مذاکرات میں شامل کرنے کا کہا، تاہم اپوزیشن رہنماؤں نے مذاکرات میں مکمل اختیار رکھنے کی یقین دہانی کرائی۔ ان کے بقول پہلے روز ہی مذاکرات کے بنیادی نکا ت پر اپوزیشن کو مکمل اختیار حاصل تھا۔

طلال چوہدری نےکہا کہ پشاور میں ملاقات کے بعد اپوزیشن نے دہشتگردی سے متعلق نکات پر 100 فیصد اتفاق کی یقین دہانی کرائی اوروفاقی حکومت کےتمام نکات سے اتفاق کیا۔ وزیر داخلہ نے وزیراعظم کو بھی آگاہ کیا کہ خیبرپختونخوا حکومت اور پی ٹی آئی دہشتگردی کے معاملے پر متفق ہیں۔

انہوں نے کہا کہ وزیر داخلہ بعد ازاں لاہور پہنچے اور وزیراعظم سے ملاقات کرکے مذاکرات میں ہونے والی پیشرفت سے آگاہ کیاجبکہ دہشتگردی سے متعلق نکات پر وزیر داخلہ نے بعد میں ٹویٹ بھی کیا پا کستا ن کی سیکیورٹی اوردہشتگردی کا خاتمہ حکومت کے لیے سب سے اہم ہے،اپوزیشن کو جتنی سیاسی اسپیس دی جاسکتی ہےدی جانی چاہیے، تاہم سیاسی فائدہ کسی بھی جماعت کو ملے، ملکی سلامتی پر سمجھوتا نہیں ہوسکتا۔

ان کا کہنا تھا کہ پاکستان کو ڈیفالٹ سے بچانے کے لیے مشکل فیصلوں کی سیاسی قیمت ادا کی گئی۔ انہوں نے کہا کہ اگر دہشتگردی ختم ہوتی ہے اور سیاسی فائدہ اپوزیشن کو ملتا ہے تو انہیں اس پر کوئی جھجک نہیں، تاہم دہشتگردی کے خاتمے پر ہر صورت مکمل اتفاق ہونا چاہیے۔

طلال چوہدری نے کہا کہ مذاکرات کے دوسرے روز دہشت گردی کے معاملے پر اتفاق ہوچکا تھا، اگر کوئی اپوزیشن رہنما اس اتفاق کی تردید کرتا ہے تو وہ سچ بتائے۔ ان کے مطابق دوسرے روز پہلے ڈرافٹ میں تمام سیاسی معاملات بھی شامل کیے گئے تھے، جن میں بانی پی ٹی آئی کی صحت، ملاقاتیں اور پی ٹی آئی رہنماؤں کے مقدمات شامل تھے۔

انہوں نےکہا کہ حکومت سمجھ رہی تھی کہ میثاق جمہوریت کیجانب بڑا بریک تھرو ہونے جارہا ہے، دہشت گردی کے خلاف متفقہ بیانیے پر پی ٹی آئی کو ساتھ لانا حکومت کے لیے بڑی کامیابی تھی، سیاسی طور پر کوئی جماعت آگے نکل جائے، حکومت کے لیے اس کی کوئی اہمیت نہیں، اصل مقصد ملک کی سلامتی ہے۔

وزیر مملکت نے کہا کہ مذاکرات کا پہلا ڈرافٹ رات 9 بجے کے قریب فائنل ہوا، جس کے بعد وزیر داخلہ ڈرافٹ لے کر وزیراعظم اور صدر مملکت سے ملاقات کے لیے روانہ ہوئے۔ ان کے بقول پہلے ڈرافٹ تک مذاکرات میں سب کچھ ٹھیک چل رہا تھا اور آخری وقت تک چند الفاظ کے سوا کوئی مسئلہ نہیں تھا۔

طلال چوہدری کے مطابق مذاکرات کے آخری مرحلے میں اپوزیشن نے الگ کمرے میں بیٹھ کر وزیراعلیٰ خیبرپختونخوا سے رابطہ کیا، اپوزیشن رہنما باہر آئے تو وہ حکومت کے نمائندوں سے نظریں نہیں ملا پا رہے تھے، بعد ازاں اتفاق رائے نہ ہونے پر اپوزیشن نے حکومت کا شکریہ ادا کیا۔

انہوں نے کہا کہ دہشت گردی کے خلاف جنگ کا بیانیہ کسی ایک جماعت کا نہیں بلکہ پورے پاکستان کا ہے۔ نیشنل ایکشن پلان کسی صوبے یا قوم کا نہیں بلکہ پاکستان کا قومی منصوبہ ہے، جبکہ نیشنل ایکشن پلان ٹو بانی پی ٹی آئی کے دور حکومت میں بھی بنایا گیا تھا، دہشت گردی کے خلاف قومی اتفاق رائے پاکستان کی سیکیورٹی اور استحکام کے لیے ضروری ہے اور نیشنل ایکشن پلان پاکستان کے آئین اور قومی سلامتی سے جڑا ہے۔

وزیر مملکت نے کہا کہ وزیراعظم اور فیلڈ مارشل روز شہدا کے جنازوں کو کندھا دیتے ہیں، شہدا کے جنازے اٹھانا حکومت کے لیے سب سے مشکل کام ہے۔ ہم 26 کروڑ پاکستانیوں کی جنگ لڑ رہے ہیں، اس لیے دہشت گردی کے خلاف متفقہ قومی مؤقف ضروری ہے اگر خیبرپختونخوا میں صرف پی ٹی آئی کے لیے سیاسی سرگرمیاں محفوظ ہوں تو یہ قابل قبول نہیں۔ عام شہری کاروبار، تعلیم اور سیاسی سرگرمیاں کر نے میں خوف محسوس کرتے ہیں، جبکہ دہشت گردی کے باعث سیاسی جماعتوں کے لیے انتخابی سرگر میا ں بھی مشکل ہوگئی ہیں۔

طلال چوہدری نے کہا کہ مذاکرات میں پاکستان کو متفقہ بیانیہ مل رہا تھا جبکہ سیاسی فائدہ پی ٹی آئی کو مل رہا تھا، تاہم پاکستان کے لیے سب سے بڑا فائدہ دہشت گردی کے خلاف متفقہ بیانیہ تھا۔ انہوں نے کہا کہ اس بار جو مارچ نکلا، اس کے بعد پاکستان میں مارچ نہیں ہوگا، مارچ سے نمٹنے کے لیے سیاسی، آئینی سمیت ہر طرح کا انتظام کیا گیا ہے، جبکہ مارچ کو کامیاب بنانے کی کوشش کرنے والے لوگوں کو سب جانتے ہیں۔

طلال چوہدری نے کہا کہ ریاست کی رٹ ہر صورت قائم ہوگی اور جرائم و انتشار کا خاتمہ کیا جائے گا۔ ریاست کو قانون کی عملداری یقینی بنانے کے لیے عملی اقدامات کرنا پڑتے ہیں، ریاست مخالف سرگرمیوں میں ملوث عناصر کے خلاف کارروائی ہوگی۔

انہوں نے کہا کہ ریاست کا فیصلہ کسی ایک جماعت کے خلاف نہیں بلکہ سب کے لیے یکساں ہوگا۔ چاہے پی ٹی آئی ہو یا کوئی اور جماعت، ریاستی قانون سب پر یکساں لاگو ہوگا۔ قانون کی عملداری اور ریاستی رٹ کا فیصلہ کسی سیاسی جماعت کا نہیں بلکہ ریاست کا ہے۔

وزیر مملکت نے کہا کہ دہشت گردی کا معاملہ پہلے ہی طے ہوچکا تھا، اس کے بعد سیاسی معاملات پر بات ہوئی۔ سیاسی معاملات میں چار، پانچ تبدیلیاں بھی کی گئیں اور حکومت نے اپوزیشن کو توقع سے زیادہ سیاسی اسپیس دی، جبکہ سیاسی جماعتوں کے لیے کئی معاملات میں گنجائش پیدا کی گئی سیاسی مطالبات تسلیم ہونے کے بعد اپوزیشن کے پاس مذاکرات سے نکلنے کا کوئی جواز نہیں تھا، تاہم اپوزیشن مذاکرات سے نظریں جھکا کر نکل گئی۔

طلال چوہدری نے کہا کہ مذاکرات اور سیاسی حل ہمیشہ حکومت کی پہلی ترجیح رہے ہیں اور پارلیمنٹ میں بیٹھ کر معاملات حل کرنا بھی حکومت کی اولین ترجیح ہے۔ہماری کبھی انا آڑے نہیں آئی، اپوزیشن میں بھی مذاکرات کی پیشکش کی، کیونکہ ہماری انا نہیں بلکہ پاکستان سب سے مقدم ہے۔

انہوں نے کہا کہ وزیراعظم آج بھی اپوزیشن کے پاس جاکر مذاکرات کے لیے تیار ہیں، تاہم لانگ مارچ اور دہشت گردی کے معاملے پر واضح شرائط موجود ہیں۔ نیشنل ایکشن پلان پر 100 فیصد عملدرآمد ضروری ہے اور یہ منصوبہ بھی انہی کے دور حکومت میں بنایا گیا تھا۔