Category: لاہور

شہبازشریف اور ان کے بیٹوں کیلئے منی لانڈرنگ کیس میں‌ درپیش مشکلات میں مزید اضافہ ہوگیا۔ مبینہ فرنٹ مین مشتاق چینی اوراس کے بیٹے نے بطور وعدہ معاف گواہ بیان ریکارڈ کرادیا ہے۔ ملزم نے سلمان شہباز کیلئے 60 کروڑ روپے کا کالا دھن سفید کرنے کا اعتراف بھی کرلیا ہے.

باغی ٹی وی نے مشتاق چینی کے بیان کی کاپی حاصل کی ہے جس کے مطابق مشتاق چینی نے بیان ریکارڈ کرواتے ہوئے کہا ہے کہ
کروڑوں روپے قرض کے فرضی معاہدے کیے گئے، میں‌ شہباز شریف کے بیٹوں‌ حمزہ اور سلمان شہباز کے ساتھ 2005 سے کاروبار کر رہا ہوں. سلمان شہباز نے ٹرانزیکشنز کو قانونی بنانے کیلئے 2 فرضی معاہدے کیے. ایک معاہدہ میرے، دوسرا میرے بیٹے کے ساتھ کیا گیا، معاہدوں کے مطابق سلمان شہباز کو 61 کروڑ قرض دیا گیا۔ بیان میں کہا گیا ہے کہ جو رقم سلمان شہباز کو ٹرانسفر کی وہ انہی کی تھی، دونوں معاہدے فرضی تھے جن کا حقیقت سے کوئی تعلق نہیں تھا، سلمان شہباز نے 10 کروڑ ہماری کمپنی کے اکاؤنٹ میں ٹرانسفر کیے، ہم پیسہ وائٹ ہو جانے کی لالچ میں کام کرتے رہے، مجھے اپنے گناہ کا احساس ہے، قانون کی مدد کیلئے تمام حقائق پر مبنی بیان دیا، جرم سرزد ہوا، معافی دی جائے۔

شریف خاندان کے مبینہ فرنٹ مین مشتاق چینی اوراس کے بیٹے نے اعترافی بیانات میں کہا ہے کہ رمضان شوگرملز کے چیف فنانشل افسر نے انہیں سلمان شہباز کا کالا دھن سفید کرنے کا کہا۔ اس مقصد کے لئے مشتاق چینی، اس کی کمپنی اور بیٹے کے اکاوئنٹ استعمال ہوئے۔ بیان میں‌کہا گیا ہے کہ معاملے کو قانونی رنگ دینے کےلئے سلیمان شہباز کو ساٹھ کروڑ روپے قرض دینے کے دو فرضی معاہدے تیار کئے گئے۔ نیب نے مشتاق چینی کو اپریل میں گرفتار کیا تھا۔ عدالت میں پہلی پیشی پر ملزم نے شریف خاندان کی ملازمت کی تردید کی تھی۔

باغی ٹی وی کی رپورٹ کے مطابق وعدہ معاف گواہ مشتاق چینی نے کہا کہ مشتاق اینڈ کمپنی کے اکاؤنٹ میں بھی 2 کروڑ 93 لاکھ کی بیرون ملک سے ٹی ٹی لگوائی گئی. میرے اکاؤنٹ میں یہ رقم سلمان شہباز کے سی ایف او نے بھجوائی جس سے میرا کوئی تعلق نہیں ہے. سلمان شہباز کے ملازم سید طاہر نقوی کے نام پر کمپنی بنائی گئی. کمپنی سے 10 کروڑ بذریعہ چیک پہلے میری کمپنی میں منتقل کیے گئے، 10 کروڑ کے چیک سلمان شہباز نے کاٹ کر عثمان کے حوالے کر دیئے، میری کمپنی کے اکاؤنٹ میں ٹی ٹی کے ذریعے 50 کروڑ روپے سلمان شہباز کے ملازم طاہر نقوی کےکمپنی سے ٹرانسفر ہوئے۔

مشتاق چینی نے کہا میں نے بینک الفلاح سمیت متعدد بینکوں میں اکاؤنٹ کھلوائے، بینک الفلاح کے منیجر عبدالقیوم کے ساتھ اسی وجہ سے تعلق بن گیا، عبدالقیوم کا بیٹا قاسم قیوم بھی منی چینجر کا کام کرتا تھا، اس سے بھی تعلق بن گیا، 2014 میں شہباز شریف فیملی کے سی ایف او محمد عثمان نے سلمان شہباز کیلئے 60 کروڑ کی رقم کرنے کا کہا، میں نے کہا اتنی بڑی رقم دے نہیں سکتا، جیسے جیسے رقم میرے اکاؤنٹ میں آتی رہی، سلمان شہباز کے چیک کاٹ کر دیتا رہا۔

واضح رہے کہ مشتاق چینی کے اس بیان میں‌ حیرت انگیز انکشافات سامنے آئے ہیں‌ جس سے شہباز شریف اور ان کے بیٹوں‌ کیلئے مزید بڑی مشکلات کھڑی ہو گئی ہیں‌ اور ان کے لئے مزید مسائل کھڑے ہوں‌گے.

پاکستان تحریک انصاف کی طرف سے قومی اسمبلی میں‌ پیش کردہ بجٹ منظوری سے روکنے کیلئے پیپلز پارٹی کے چیئرمین بلاول بھٹو زرداری اور مریم نواز میں‌ اتفاق رائے ہو گیا ہے اور اس امر کا فیصلہ کیا گیا ہے کہ پارلیمنٹ میں‌ ہر صورت اس بجٹ کو پاس ہونے سے روکنے کی کوشش کی جائے گی.

باغی ٹی وی کی رپورٹ کے مطابق چیئرمین پاکستان پیپلز پارٹی بلاول بھٹو زرداری کا کہنا ہے کہ حکومت کی طرف سے عوام دشمن بجٹ پیش کیا گیا ہے. بلاول بھٹو زرداری مسلم لیگ (ن) کی نائب صدر مریم نواز شریف کی دعوت پر جاتی امراء پہنچی تھیں جبکہ اس موقع پر پارٹی کی سینئر قیادت بھی ان کے ہمراہ تھی۔ اس اہم ملاقات کے دوران مریم نواز اور بلاول بھٹو زرداری نے میثاق جمہوریت کو اس کی روح کے مطابق آگے بڑھنے کا فیصلہ کیا اور کہا گیا کہ آئین، پارلیمان، عوام، اپوزیشن، عدلیہ اور میڈیا سمیت ہر اختلافی آواز پر حکمران حملہ آور ہیں۔ نئے پاکستان کے نام پر ہونے والا فراڈ قوم کو مزید برداشت نہیں، قوم ہماری طرف دیکھ رہی ہے، اسے مایوس نہیں کریں گے۔

بلاول بھٹو زرداری کا کہنا تھاکہ پارلیمنٹ میں بجٹ کو منظور ہونے سے روکیں گے . بے نظیر بھٹو کی سالگرہ پر نواب شاہ میں جلسہ ہوگا اور وہیں سے حکومت کے خلاف تحریک شروع کی جائے گی. ملاقات کے دوران حکومتی اور اپوزیشن رہنماؤں‌ کا کہنا تھا کہ
موجودہ حکومتی انتظام مکمل طور پر ناکام ہو چکا ہے۔ ایک سازش کے تحت اپوزیشن لیڈروں‌ کی گرفتاریاں‌ کی جارہی ہیں. ان کا کہنا تھا کہ حکومت کو چاہیے کہ وہ اپنا بجٹ تبدیل کرے اور عوام کو مہنگائی کی چکی میں نہ پیسا جائے بلکہ انہیں‌ ریلیف ملنا چاہیے. اگر یہ حکومت اپنا بجٹ تبدیل نہیں کرتی تو پھر پیپلز پارٹی اپنا بجٹ پیش کرے گی ۔ انہوں نے کہاکہ ملکی ترقی کیلئے ہمیں‌ مل کر جدوجہد کرنا ہو گی.

پاکستان پیپلز پارٹی کے چیئرمین بلاول بھٹو نے پارٹی کے اہم رہنما اعتزاز احسن سے بھی ملاقات کی ہے. وہ مریم نواز سے ملاقات کے بعد بیدیاں‌ روڈ پر اعتزاز احسن کی رہائش گاہ پر پہنچے اور ان سے ملاقات کی.

باغی ٹی وی کی رپورٹ‌ کے مطابق دونوں رہنماؤں کے مابین ملاقات میں‌ اپوزیشن رہنماؤں کی گرفتاریوں، ملک کی تازہ ترین صورتحال اور باہمی دلچسپی کے امور پر تبادلہ خیال کیا گیا. قبل ازیں بلاول بھٹو زرداری نے جاتی عمرہ میں مریم نواز سے ملاقات کی اور اس دوران حکومت کیخلاف متحد ہوکر جدوجہد کرنے پر اتفاق کیاگیا.

باغی ٹی وی رپورٹ کےمطابق اس موقع پر مریم نواز نے قمر الزمان کائرہ سے ان کے بیٹے کی وفات پر اظہار تعزیت اور دعا کی. اس دوران پیپلزپارٹی اور مسلم لیگ ن کی قیادت میں حکومت کےخلاف جدوجہد پر اتفاق ہوا،بجٹ کے متعلق مشترکہ عملی کےلئے اعلیٰ سطحی رابطے برقرار رکھنے کا فیصلہ کیاگیا ہے، ملاقات میں اتفاق کیاگیا ہے کہ دونوں جماعتوں کی قیادت دیگر اپوزیشن جماعتوں سے بھی رابطے کریں گی۔

پاکستان کے مختلف شہروں میں‌ رمضان المبارک کے آخری عشرہ سے شدید گرمی پڑ رہی تھی اور درجہ حرارت 48 ڈگری تک رہا تاہم آج پنجاب کے مختلف شہروں میں‌بارش سے موسم خوشگوار ہو گیا ہے.

باغی ٹی وی کی رپورٹ کے مطابق صوبائی دارالحکومت پنجاب کے شہر لاہور میں تیز ہواﺅں کے ساتھ بارش نے گرمی کا زور توڑ دیا جس کے گرمی سے پریشان شہر یوں میں خوشی کی لہر دوڑ گئی ۔ لاہور کے علاقوں مال روڈ ،ہال روڈ ،قلعہ گجر سنگھ ،جیل روڈ ،وحدت روڈ ، ٹاون شپ اور جوہر ٹاﺅن سمیت مختلف علاقوں میں گرج چمک اور تیز ہواﺅں کے ساتھ بارش ہو رہی ہے ۔

صوبائی دارالحکومت لاہور کی طرح جنوبی اور وسطی پنجاب کے مختلف علاقوں میں بھی بارش کا سلسلہ جاری ہے ۔ فیصل آباد، چنیوٹ، ہارون آباد ،فورٹ عباس ،ننکانہ ،شیخوپورہ ،سانگلہ ہل ،مانا نوالہ، حافظ آباد، مریدکے، کامونکے، گوجرانوالہ میں بھی بارش کا سلسلہ جاری ہے ۔ حالیہ بارشوں سے گرمی کی شدت کم ہو گئی ہے. گزشتہ روز مغرب سے پہلے ہی تیز ہوا چلنے سے موسم خوشگوار ہو گیا اور کچھ دیر کیلئے اندھیرا سا چھایا رہا.