اداکارہ صبا قمر اور گلوکار بلال سعید نے اجازت نامے کی خلاف ورزی کرتے ہوئے لاہور کی مسجد وزیر خان میں رقص کیا: محکمہ اوقاف
باغی ٹی وی : پاکستانی گلوکار بلال سعید اور اداکارہ صبا قمر نئے گانے ’قبول ہے‘ کی تاریخی مسجد میں ڈانس کرنے کے مناظر کی عکس بندی پر تنازع کا شکار ہو گئے تھے ، مسجد میں ڈانس ویڈیو وائرل ہونے کے بعد معروف مذہبی و سیاسی شخصیات سمیت عوام نے غم و غصے کا اظہار کرتے ہوئے حکومت سے دونوں فنکاروں کے خلاف قانونی کارروائی کرنے کا مطالبہ کیا تھا-
جس کے بعد دونوں فنکاروں نے عوام کا دل دُکھانے پر معافی بھی مانگی تھی اور یقین دہانی کرائی تھی کہ وہ یہ مناظر گانے کی ویڈیو سے ہٹا دیں گے
جس کے بعد اداکارہ صبا قمر اور بلال سعید کے خلاف دفعہ 295 کے تحت مقدمہ درج کیا گیا ہے ایف آئی آر میں کہا گیا ہے کہ اداکارہ صبا قمر اور بلال سعید نے مسجد کا تقدس پامال کیا لہٰذا ان دونوں کے خلاف کارروائی کی جائے گی۔
جس کے بعد سیکرٹری اوقاف پنجاب نے ٹویٹر پر اپنے ٹویٹ میں لکھا تھا کہ سیکرٹری اوقاف حکومت پنجاب نے پہلے ہی ڈی جی اوقاف کو مسجد وزیرخان معاملے کی انکوائری کرنے کا حکم دے دیا ہے جہاں نجی کمپنی نے صبا قمر بلال سعید کی ویڈیو شوٹ کرنے سے این او سی کی شرائط کی خلاف ورزی کی ہے
انہوں نے اپنے ٹویٹ میں یقین دہانی کرائی تھی کہ پی پی ایل میں شامل ایڈمن کے خلاف سخت کارروائی کی جائے گی-
تاہم محکمہ اوقاف نے فوری تحقیقات کا آغاز کر دیا تھا تاہم اب محکمہ اوقاف کی تحقیقاتی رپورٹ سامنے آ گئی ہے-
اطلاعات کے مطابق محکمہ اوقاف کی تحقیقاتی رپورٹ میں انکشاف کیا گیا ہے کہ اداکارہ صبا قمر اور بلال سعید نے اجازت نامے کی خلاف ورزی کرتے ہوئے رقص کیا ہے۔
دوسری جانب ڈپٹی ڈائریکٹر فنانس محکمہ اوقاف نے بھی اپنی تحقیقاتی رپورٹ میں اداکاروں کی جانب سے خلاف ضابطہ ڈانس کی تصدیق کر دی ہے۔
مسجد وزیر خان میں اداکاروں کے ڈانس کی عکس بندی کے بعد محکمہ اوقاف نے صوبہ بھر کی تمام مساجد اور مزارات پر فلم اور ڈراموں کی ریکارڈنگ پر پابندی عائد کر دی ہے۔
ڈی جی محکمہ اوقاف پنجاب ڈاکٹر طاہر رضا بخاری کا کہنا تھا کہ مسجد وزیر خان میں ڈانس کے ذمہ دار مینجر سمیت تین اہلکاروں کو معطل کر کے پیڈا ایکٹ کے خلاف کارروائی شروع کر دی ہے۔
محکمہ اوقاف کا کہنا ہے کہ مساجد میں اب سے نکاح پڑھانے کی اجازت ہو گی لیکن دلہا دلہن فوٹو شوٹ نہیں کرا سکیں گے۔
