وزیراعظم کی سعودی عرب روانگی، پی آئی اے کو یومیہ کتنا نقصان اٹھانا پڑ سکتا ہے؟

0
39

اسلام آباد: پی آئی اے ذرائع کا کہنا ہے کہ وزیراعظم کی جانب سے عمرہ ادائیگی کے لیے پی آئی اے کا طیارے بوئنگ 777 طلب کئے جانے پر ادارے کو یومیہ 50 ہزار ڈالر کے نقصان کا خدشہ ہے-

باغی ٹی وی : تفصیلات کے مطابق پی آئی اے ذرائع کا کہنا ہے کہ وزیراعظم آفس کا پی آئی اے سے رابطہ ہوا جس میں انہوں نے وزیراعظم آفس کے لیے بوئنگ 777 جہاز مانگا ہے، بوئنگ 777 طیارہ وزیراعظم شہباز شریف اور ارکان اسمبلی کو لے کر سعودی عرب جائے گا۔

ذرائع کے مطابق وزیراعظم کے دورہ سعودی عرب کے لیے پی آئی اے کا طیارہ استعمال ہوگا، اس وقت عمرہ سیزن چل رہا ہے اور بوئنگ طیارے کے فضائی بیڑے سے الگ ہونے پر پی آئی اے کو نقصان ہوگا۔

ذرائع کا کہنا ہے کہ پی آئی اے کا طیارہ وزیراعظم کے استعمال میں آنے کی وجہ سے پی آئی اے کو روزانہ 50 سے 60 ہزار ڈالر کا نقصان ہوسکتا ہے۔

قبل ازیں وزیر اعظم شہباز شریف کی زیر صدارت آنے والے سعودی عرب دورے کی تیاری کے حوالے سے اجلاس ہوا۔ اجلاس میں مسلم لیگ (ن) کے رکن قومی اسمبلی شاہد خاقان عباسی، وزیر برائے سمندر پار پاکستانی ساجد حسین طوری، وزیر اطلاعات و نشریات مریم اورنگزیب، وزیر مملکت برائے امور خارجہ حنا ربانی کھر، وزیر اعظم کے معاون خصوصی طارق فاطمی اور اعلی متعلقہ حکام نے شرکت کی۔

وزیر اعظم نےاجلاس میں ہدایت دی کہ وہ پاک سعودی تعلقات کوخاص طورپرروزگار، توانائی، فوڈ سیکیورٹی اورطویل المدتی اسٹریٹیجک شراکت داری کو فروغ دینے کے لیے موثر سفارشات مرتب کریں۔

انہوں نے کہا کہ پاکستان اور سعودی عرب عوامی سطح پر اسلامی بھائی چارے کے لازوال رشتے میں بندھے ہیں، پاکستانی اپنے سعودی بھائیوں کے ساتھ ان دیرینہ تعلقات کو انتہائی قدر کی نگاہ سے دیکھتے ہیں۔

واضح رہے کہ وزیر اعظم شہباز شریف بدھ کو سعودی عرب کا دورہ کریں گے ۔مریم نواز ، مولانا فضل الرحمن اور وفاقی وزرا بھی وزیر اعظم کے ساتھ ہوں گے مولانا فضل الرحمان اور مریم نواز عمرہ کی ادائیگی بھی کریں گے –

یاد رہے کہ وزارت عظمی کا منصب سنبھالنے کے بعد وزیر اعظم شہباز شریف کا یہ پہلا غیر ملکی دورہ ہے-

Leave a reply