پنچائیتی نظام کے نفاذ کی اصولی منظوری، تحریر:ندیم یعقوب گوہر
نقطہ نظر
پنجاب کی فضاؤں میں ایک بار پھر دیہی دانش اور صدیوں پرانی روایتی صلح جوئی کی بازگشت سنائی دے رہی ہے، کیونکہ حکومتِ پنجاب نے صوبے میں پنچائیتی نظام کے نفاذ کی اصولی منظوری دے دی ہے۔ یہ فیصلہ ایسے وقت میں سامنے آیا ہے جب ضلعی عدالتوں سے لے کر اعلیٰ عدلیہ تک لاکھوں مقدمات کی فائلیں گرد اٹا رہی ہیں اور ایک عام سائل کے لیے انصاف کا حصول برسوں کی مشقت، وکیلوں کی بھاری فیسوں اور کچہریوں کے لامتناہی چکروں کا استعارہ بن چکا ہے۔ اس حکومتی اقدام نے جہاں دیہی آبادیوں میں سستے اور فوری انصاف کی ایک نئی امید جگائی ہے، وہیں قانونی ماہرین اور سماجی حلقوں کے درمیان اس بحث کو بھی نئی زندگی بخشی ہے کہ آیا صدیوں پرانا یہ سماجی ڈھانچہ جدید دور کے قانونی تقاضوں اور انسانی حقوق کے معیارات سے ہم آہنگ ہو کر چل سکے گا یا نہیں۔
جب ہم پنچائیت نظام کی بات کرتے ہیں تو درحقیقت ہم برصغیر کی اس قدیم ترین معاشرتی روایت کا ذکر کر رہے ہوتے ہیں جو صدیوں سے دیہی زندگی کے نظم و ضبط کی ضامن رہی ہے۔ لفظ پنچائیت سنسکرت کے لفظ "پنچ" یعنی پانچ سے ماخوذ ہے، جس کا تصور گاؤں یا برادری کے ایسے پانچ معزز، غیر جانبدار اور تجربہ کار افراد کی مجلس پر مبنی ہے جن کی دیانت داری اور فہم و فراست پر مقامی لوگوں کو غیر متزلزل اعتماد ہو۔ یہ محض کوئی عدالتی بینچ نہیں بلکہ گاؤں کی چوپال یا برگد کے سائے تلے بیٹھنے والی ایک ایسی اخلاقی مجلس ہوا کرتی تھی جس کا بنیادی فلسفہ کسی فریق کو شکست دے کر نیچا دکھانا نہیں، بلکہ دونوں فریقین کی عزتِ نفس کو برقرار رکھتے ہوئے ان کے درمیان دلوں کی کدورتیں صاف کرنا اور گاؤں کے اجتماعی امن کو بچانا ہوتا تھا۔
پنچائیت کے کام کرنے کا طریقہ کار روایتی عدالتی پیچیدگیوں سے بالکل مختلف اور سادگی پر مبنی ہے۔ اس میں جب دو فریقین کے درمیان کوئی تنازع پیدا ہوتا ہے تو وہ باہمی رضامندی سے معاملہ گاؤں کے معززین کے سامنے رکھتے ہیں۔ کھلی مجلس میں دونوں فریقین کو اپنا موقف بیان کرنے کا پورا موقع دیا جاتا ہے، مقامی گواہوں کی بات سنی جاتی ہے اور چونکہ پنچائیت کے ارکان خود اسی مٹی اور ماحول کا حصہ ہوتے ہیں، اس لیے وہ فریقین کے خاندانی پس منظر اور مقامی حقائق سے بخوبی واقف ہوتے ہیں، جس سے جھوٹ اور سچ کی پہچان آسان ہو جاتی ہے۔ فیصلہ کسی سخت تعزیراتی دفعہ کے بجائے مقامی روایات، اخلاقی اقدار اور تلافی کے اصولوں پر کیا جاتا ہے، اور اس پر عمل درآمد پولیس کے ڈنڈے سے نہیں بلکہ برادری کے احترام اور سماجی دباؤ کی قوت سے ہوتا ہے۔
اگر پنچائیت کے دائرہ اختیار کی بات کی جائے تو روایتی اور مجوزہ دونوں صورتوں میں اس کا اصل میدان چھوٹے دیوانی، گھریلو اور سماجی معاملات ہی رہے ہیں۔ دیہی معاشرت میں کھیتوں کی منڈیروں اور حد بندی کے جھگڑے، نہری پانی کی باری کے تنازعات، وراثت کی تقسیم، قرض اور لین دین کے معاملات، میاں بیوی کی ناچاقیاں اور رشتوں ناطوں کے مسائل ہمیشہ سے پنچائیت کے سپرد کیے جاتے رہے ہیں۔ اس کے برعکس قتل، ڈکیتی یا سنگین نوعیت کے فوجداری جرائم کو ہمیشہ ریاست اور باقاعدہ عدالتوں کا دائرہ اختیار سمجھا گیا ہے، اور حکومتِ پنجاب کے حالیہ اقدام میں بھی یہی کوشش کارفرما دکھائی دیتی ہے کہ پنچائیتوں کو محض قابلِ مصالحت اور مقامی تنازعات تک محدود رکھا جائے تاکہ تھانے اور کچہری کی دہلیز تک پہنچنے سے پہلے ہی معمولی رنجشیں ختم ہو سکیں۔
تاہم، یہاں روایتی پنچائیت نظام اور جدید متبادل تنازعاتی حل یعنی اے ڈی آر کے درمیان فرق اور ان کی قانونی حیثیت کو سمجھنا ازحد ضروری ہے۔ روایتی غیر رسمی پنچائیت کے پاس کوئی آئینی یا قانونی جواز نہیں ہوتا؛ ماضی میں اعلیٰ عدالتیں بھی غیر قانونی جرگوں اور پنچائیتوں کے متوازی عدالتی نظام بننے کے خلاف واضح احکامات جاری کر چکی ہیں کیونکہ ان کے فیصلوں کی کوئی قانونی توثیق نہیں ہوتی۔ اس کے برعکس، جدید متبادل تنازعاتی حل یا مصالحاتی کونسلز ایک باقاعدہ قانونی ڈھانچے، جیسے پنجاب آلٹرنیٹ ڈسپیوٹ ریزولوشن ایکٹAlternative Dispute Resolution - ADR)
، کے تحت کام کرتی ہیں۔ سرکاری سرپرستی میں بننے والے اس نظام میں تربیت یافتہ اور غیر جانبدار ثالث مقرر کیے جاتے ہیں، کارروائی کو خفیہ اور شفاف رکھا جاتا ہے، اور جب فریقین کے درمیان صلح نامہ طے پا جاتا ہے تو اسے تحریری شکل دے کر متعلقہ عدالت میں پیش کیا جاتا ہے، جہاں عدالت اس معاہدے کو باقاعدہ ڈگری یا قانونی فیصلے کا درجہ دے دیتی ہے۔ یوں روایتی اخلاقی طاقت کو جدید قانونی تحفظ مل جاتا ہے اور کوئی فریق بعد ازاں اپنے قول سے منحرف نہیں ہو سکتا۔
معاشرے پر اس نظام کے مرتب ہونے والے اثرات دو دھاری تلوار کی مانند ہیں جن میں مثبت اور منفی دونوں پہلو پوری شدت سے موجود ہیں۔ مثبت پہلوؤں پر نظر دوڑائیں تو سب سے بڑا فائدہ وقت اور سرمائے کی بچت ہے۔ ایک غریب کسان یا مزدور جو برسوں کچہریوں کے چکر کاٹ کر اپنی جمع پونجی لٹا دیتا ہے، اسے اپنے ہی گاؤں میں فوری اور مفت انصاف میسر آتا ہے۔ مزید برآں، عدالتی فیصلوں میں ایک فریق جیتتا ہے اور دوسرا ہارتا ہے جس سے نسلوں تک چلنے والی دشمنیاں جنم لیتی ہیں، جبکہ پنچائیت کی صلح صفائی دونوں فریقین کو گلے لگا کر دشمنی کا بیج ہمیشہ کے لیے ختم کر دیتی ہے اور عدالتوں کے کندھوں سے غیر ضروری مقدمات کا بوجھ بھی ہلکا ہوتا ہے۔
دوسری طرف اس تصویر کا منفی رخ بھی نظر انداز نہیں کیا جا سکتا۔ ہمارے دیہی معاشرے کی ساخت میں جاگیردارانہ اثر و رسوخ اور طاقت کا توازن اب بھی ایک تلخ حقیقت ہے۔ ناقدین کا یہ خدشہ بالکل بے بنیاد نہیں کہ اگر پنچائیتوں پر بااثر وڈیروں یا مقامی طاقتور طبقے کا غلبہ ہو گیا تو غریب مزارع، خواتین اور اقلیتیں انصاف کے بجائے سماجی دباؤ اور بائیکاٹ کے خوف سے یکطرفہ فیصلے ماننے پر مجبور ہو جائیں گی۔ ماضی میں بعض غیر رسمی پنچائیتوں کی جانب سے قانون اور انسانی حقوق کے منافی دیے گئے بعض متنازع فیصلے اس بات کا ثبوت ہیں کہ قانونی تربیت اور ریاستی نگرانی کے بغیر یہ ادارہ ظلم کا آلہ بھی بن سکتا ہے۔
لہٰذا، حکومتِ پنجاب کی جانب سے پنچائیتی نظام کی اصولی منظوری ایک خوش آئند مگر "نہایت حساس قدم" ہے۔ اس تجربے کی کامیابی کا دارومدار اس بات پر ہوگا کہ حکومت روایتی پنچائیت کی روح کو برقرار رکھتے ہوئے اسے جدید قانونی ضوابط کے سانچے میں کس طرح ڈھالتی ہے۔ اگر ان پنچائیتوں میں دیانت دار، غیر جانبدار اور پڑھے لکھے افراد کے ساتھ ساتھ خواتین کی نمائندگی کو یقینی بنایا جائے، ان کے اختیارات کو سختی سے دیوانی اور مصالحاتی معاملات تک محدود رکھا جائے، اور ہر فیصلے کو آئین و قانون کی بالادستی اور عدالتی نظرِ ثانی کے تابع رکھا جائے، تو یہی پنچائیت نظام پنجاب کے دیہات میں امن، بھائی چارے اور فوری انصاف کی ایک روشن مثال بن سکتا ہے۔
مزید پڑھیں





