اے آئی مواد تیار کرنے والوں کے خلاف سخت کارروائی ہونی چاہیے،سلمان خان

بالی ووڈ سپر اسٹار سلمان خان نے کہا ہے کہ جعلی اے آئی ویڈیوز بنانے والوں کو جیل میں ڈال دینا چاہیے۔

اداکار نے حال ہی میں اپنے رئیلیٹی شو ’بگ باس 20‘ میں  سوشل میڈیا پر مصنوعی ذہانت (اے آئی) کے ذریعے جعلی ویڈیوز بنانے والوں کو تنقید کا نشانہ بنایا, کہا کہ کسی نے اے آئی ویڈیو بنائی یا اے آئی کے ذریعے آواز ڈب کی تو یہ غلط ہے، اے آئی اتنی ترقی کر چکا ہے کہ یہ بہت خوفناک صورتحال ہے اور  انتہائی سنجیدہ معاملہ ہے۔

انہوں نے کہا کہ آپ نے کوئی بات کی اور کسی نے اے آئی کا استعمال کرتے ہوئے اس میں ردوبدل کرکے کسی کو گالی دلوادی، آپ جانتے ہیں وہ کیا کر رہے ہیں؟ وہ اے آئی ویڈیوز بنا رہے ہیں۔

اداکار نے انکشاف کیا کہ وہ خود بھی اس قسم کے مواد کا شکار رہ چکے ہیں، جو لوگ یہ نہیں جانتے کہ یہ مواد اے آئی سے تیار کردہ ہے، وہ شاید یہ پوسٹ کردیں کہ سلمان خان وہاں موجود تھے لیکن جو لوگ اس حقیقت سے واقف ہیں اور پھر بھی ایسی ویڈیو بناتے ہیں، وہ کس قسم کے لوگ ہیں؟-

سلمان خان نے کہاکہ ایسے لوگوں کو جیل بھیج دینا چاہیے، جب تک ایک دو ایسے لوگ جیل نہیں جائیں گے، تب تک یہ سلسلہ رکنے والا نہیں ہے، اس حوالے سے قانون سازی ہونی چاہیے اور سوشل میڈیا پر سنسرشپ کا نظام بھی ہونا چاہیے۔