"ماضی کی سرگوشیاں انسان کا حال برباد کر دیتی ہیں"
کبھی آپ نے تنہائی میں ایک عجیب سی سرگوشی سنی ہے؟ کوئی دھیمی سی آواز جو کان میں کہتی ہے کہ "تم آگے نہیں بڑھ سکتے، تمہارا ماضی تمہیں آگے جانے نہیں دے گا؟"
یہ آواز کسی انسان کی نہیں، یہ ہمارے اپنے ماضی کی ہے۔ بعض اوقات انسان اپنے ماضی کو بھول کر آگے بڑھنا چاہتا ہے، اپنے مستقبل کو روشن کرنے کی کوشش میں لگا رہتا ہے، مگر پھر اچانک یہی ماضی ایک سائے کی طرح اس کا پیچھا کرنے لگتا ہے۔
وہی پرانی غلطیاں، وہی پرانے طعنے، وہی تنگ و تاریک گلیاں۔ انسان سوچنے پر مجبور ہو جاتا ہے کہ آخر میرا ماضی میرا پیچھا کیوں نہیں چھوڑ رہا؟ یہ محض الفاظ نہیں، یہ میرا اور آپ سب کا مشاہدہ ہے۔
یقیناً اس سرگوشی کے پیچھے اللہ کی کوئی حکمت پوشیدہ ہوتی ہے۔ اللہ تبارک و تعالیٰ اسی ماضی کے ذریعے ہمیں جھنجھوڑنا چاہتا ہے، ہمیں کوئی سبق دینا چاہتا ہے جو ہم جلد بازی میں نظر انداز کر گئے تھے۔ اللہ نہیں چاہتا کہ ہم ماضی کو کھرچ کھرچ کر زخم تازہ کریں، بلکہ وہ چاہتا ہے کہ ہم اس سے سیکھ کر اپنا آنے والا کل سنواریں۔ کیونکہ جو اپنی غلطیوں سے سیکھتا ہی نہیں، وہ اپنا مستقبل کیسے روشن کر سکتا ہے؟
تو ان سرگوشیوں سے نجات کیسے ملے؟ اس کا حل دو چیزوں میں ہے:
1. توبہ کے پانی سے ماضی کو دھو دیں: ماضی کا بوجھ تب تک پیچھا کرتا ہے جب تک ہم اسے اللہ کے سپرد نہیں کرتے۔ جو غلطی ہو گئی، اس پر سچی توبہ کر کے اسے اللہ کی رحمت کے حوالے کر دیں۔ بے شک اللہ فرماتا ہے: "کہہ دو اے میرے بندو جنہوں نے اپنی جانوں پر زیادتی کی ہے، اللہ کی رحمت سے مایوس نہ ہو" (الزمر: 53)۔ جب رب نے معاف کر دیا تو پھر آپ خود کو سزا کیوں دے رہی ہیں؟
2. توکل سے حال کو مضبوط کریں: شیطان کا سب سے بڑا ہتھیار یہی ہے کہ وہ آپ کو ماضی میں الجھا کر آپ کا آج برباد کر دے۔ اس سرگوشی کو جواب دیں کہ میرا ماضی گزر گیا، میرا حال میرے ہاتھ میں ہے اور میرا مستقبل میرے رب کے ہاتھ میں۔
یاد رکھیے! ماضی ایک قبرستان ہے، اور قبرستان میں رہا نہیں کرتے، وہاں سے صرف عبرت لی جاتی ہے۔ اصل زندگی تو آج کے اس لمحے میں ہے۔ اٹھیے، ان سرگوشیوں کے حصار سے نکلیے اور زندگی کے خالی صفحات کو توبہ اور امید کے سنہرے حروف سے لکھنا شروع کیجیے۔ ان شاء اللہ الکریم، آنے والا کل گزرے ہوئے کل سے بہتر ہوگا۔
