انسان کی زندگی میں بعض زخم ایسے ہوتے ہیں جو دکھائی نہیں دیتے، مگر ان کا درد برسوں محسوس ہوتا رہتا ہے۔ ان زخموں کا سبب کوئی حادثہ، کوئی جسمانی چوٹ یا کوئی بیماری نہیں ہوتی، بلکہ بعض اوقات چند الفاظ ہوتے ہیں جو کسی کی زبان سے ادا ہو کر دوسرے کے دل میں اتر جاتے ہیں۔ یہ الفاظ بظاہر معمولی ہوتے ہیں، لیکن ان کی چبھن دیر تک انسان کے وجود میں محسوس ہوتی رہتی ہے۔
ہم ایک ایسے معاشرے میں رہتے ہیں جہاں گفتگو کو معمولی اور الفاظ کو بے ضرر سمجھ لیا گیا ہے۔ کسی کی شکل و صورت پر تبصرہ کرنا، اس کی معاشی حیثیت کا مذاق اڑانا، اس کی ناکامیوں کو محفلوں میں اچھالنا یا اس کے ماضی کو بار بار یاد دلا کر شرمندہ کرنا ہمارے ہاں اکثر بے تکلفی کے نام پر جائز سمجھ لیا جاتا ہے۔ بولنے والا چند لمحوں بعد اپنی بات بھول جاتا ہے، مگر سننے والا بعض اوقات اسی ایک جملے کو مدتوں اپنے اندر لیے پھرتا ہے۔
دلچسپ بات یہ ہے کہ ہم دوسروں کے رویوں سے پیدا ہونے والی تکلیف تو محسوس کرتے ہیں، لیکن اپنے الفاظ سے پہنچنے والی اذیت کا احساس کم ہی کرتے ہیں۔ ہمیں یہ تو یاد رہتا ہے کہ فلاں شخص نے ہمارے ساتھ کس موقع پر کیا کہا تھا، مگر شاید ہی کبھی ہم نے سوچا ہو کہ ہماری کسی بات نے کسی دوسرے کے دل پر کیا اثر چھوڑا ہوگا۔ ہم اپنی زبان کو اظہار کا ذریعہ سمجھتے ہیں، حالاں کہ یہی زبان کسی کے لیے حوصلے کا سبب بھی بن سکتی ہے اور مایوسی کا دروازہ بھی کھول سکتی ہے۔
بعض لوگ دوسروں کی کمزوریوں کو اپنی گفتگو کا موضوع بنا لیتے ہیں۔ کسی کی غربت، کسی کی کم تعلیم، کسی کی جسمانی ساخت یا کسی کی ذاتی زندگی پر طنز کرنا انہیں اپنی برتری کا احساس دلاتا ہے۔ وہ شاید یہ نہیں سمجھتے کہ کسی انسان کی مجبوری کو موضوعِ مذاق بنانا دراصل اپنی تربیت اور ظرف کی کمزوری ظاہر کرنا ہے۔ کسی کے پاس کم وسائل ہونا اس کا جرم نہیں، کسی کا تعلیم میں پیچھے رہ جانا اس کی تذلیل کا جواز نہیں اور کسی کی زندگی میں پیش آنے والی ناکامی اسے بے توقیر کرنے کا اجازت نامہ نہیں۔
یہ بھی ایک تلخ حقیقت ہے کہ چھبتے الفاظ ہمیشہ اجنبیوں کی طرف سے نہیں ملتے۔ کبھی کبھی اپنے ہی لوگ ایسے جملے کہہ جاتے ہیں جن کی تکلیف دوسروں کی باتوں سے کہیں زیادہ ہوتی ہے۔ کیونکہ اپنوں سے انسان محبت، احترام اور سمجھ داری کی توقع رکھتا ہے۔ جب یہی لوگ اس کی کمزوریوں کو نشانہ بناتے ہیں تو تکلیف صرف الفاظ سے نہیں ہوتی، بلکہ اس اعتماد کو بھی ٹھیس پہنچتی ہے جس کی بنیاد پر رشتے قائم ہوتے ہیں۔
ہمیں یہ فرق سمجھنے کی ضرورت ہے کہ سچ بولنا اور کسی کو تکلیف پہنچانا دو الگ باتیں ہیں۔ سچائی کا اظہار بھی شائستگی کے ساتھ کیا جا سکتا ہے۔ کسی کی اصلاح مقصود ہو تو لہجے میں نرمی اور الفاظ میں احترام ہونا چاہیے۔ محض یہ کہہ دینا کہ ’’میں تو سچ بولتا ہوں‘‘ کسی کی دل آزاری کا جواز نہیں بن سکتا۔ ہر سچ ہر جگہ اور ہر انداز میں بیان کرنا ضروری نہیں ہوتا۔ بعض اوقات خاموشی بھی اس لیے بہتر ہوتی ہے کہ ہمارے الفاظ کسی ایسے دل کو زخمی نہ کر دیں جو پہلے ہی کئی دکھ سمیٹے بیٹھا ہو۔
معاشرتی رویوں کی اصلاح کا آغاز بڑے نعروں سے نہیں بلکہ چھوٹی چھوٹی عادتوں سے ہوتا ہے۔ ہمیں گفتگو سے پہلے یہ سوچنے کی ضرورت ہے کہ جو بات ہم کسی دوسرے سے کہنے جا رہے ہیں، اگر یہی بات ہمیں سننی پڑے تو ہمارا ردعمل کیا ہوگا؟ کیا ہم اسے خوش دلی سے قبول کر سکیں گے؟ اگر جواب نفی میں ہے تو شاید ہمیں اپنے الفاظ پر دوبارہ غور کرنا چاہیے۔
یہ یاد رکھنا چاہیے کہ انسان کی شخصیت کا اندازہ صرف اس کے لباس، عہدے، دولت یا تعلیم سے نہیں ہوتا، بلکہ اس کے لہجے اور دوسروں کے ساتھ برتاؤ سے بھی ہوتا ہے۔ خوب صورت الفاظ کسی اجنبی کو اپنا بنا سکتے ہیں، جبکہ تلخ جملے برسوں پرانے تعلقات میں بھی دراڑ ڈال سکتے ہیں۔
ہم زندگی میں بہت کچھ بھول جاتے ہیں، مگر بعض آوازیں، بعض لہجے اور بعض جملے یادداشت میں مستقل جگہ بنا لیتے ہیں۔ اس لیے بولنے سے پہلے سوچنا محض اخلاقی نصیحت نہیں، ایک بنیادی انسانی ذمہ داری ہے۔
آخر میں بس اتنی سی گزارش ہے کہ اپنے الفاظ کا انتخاب احتیاط سے کیجیے۔ ممکن ہے آپ کے لیے وہ محض ایک جملہ ہو، مگر کسی دوسرے کے لیے وہ ایک ایسا زخم بن جائے جسے بھرنے میں پوری عمر گزر جائے۔ کیونکہ زبان سے نکلے ہوئے الفاظ واپس تو نہیں آتے، البتہ ان کی چبھن بہت دیر تک باقی رہتی ہے۔
مزید پڑھیں
