انسان کا دل بھی عجیب شہر ہوتا ہے۔ اس شہر میں بے شمار گلیاں آباد ہوتی ہیں۔ کچھ گلیاں روشنیوں سے بھری ہوتی ہیں، جہاں بچپن کی معصوم ہنسی، دوستوں کی شرارتیں اور زندگی کے بے فکر دن آج بھی سانس لیتے محسوس ہوتے ہیں۔ کچھ گلیاں ایسی ہوتی ہیں جہاں وقت جیسے کسی ایک لمحے پر آ کر ٹھہر گیا ہو اور کچھ ایسی بھی ہوتی ہیں جن سے گزرتے ہوئے انسان اپنے ہی قدموں کی آہٹ سے گھبرا جاتا ہے۔
ہم اپنی زندگی میں کتنے ہی لوگوں سے ملتے ہیں۔ کچھ ہمارے ساتھ چند قدم چلتے ہیں، کچھ برسوں کا سفر طے کرتے ہیں اور کچھ ایسے ہوتے ہیں جن کے ساتھ گزرا ہوا مختصر وقت بھی پوری عمر پر محیط محسوس ہوتا ہے۔ مگر زندگی کی سب سے عجیب حقیقت یہ ہے کہ ہر ساتھ ہمیشہ کے لیے نہیں ہوتا۔ کچھ لوگ راستے بدل لیتے ہیں، کچھ فاصلے اختیار کر لیتے ہیں اور کچھ موت کی ایسی سرحد پار کر جاتے ہیں جہاں سے واپسی کا کوئی راستہ نہیں ہوتا۔
کبھی کبھی ماضی کی طرف نظر اٹھتی ہے تو یوں محسوس ہوتا ہے جیسے زندگی کا ایک پورا شہر کبھی ہمارے ساتھ آباد تھا۔ اسکول کے وہ دن، سہیلیوں کے ساتھ گزرتے لمحات، بے مقصد باتوں پر کھلکھلا کر ہنسنا، چھوٹی چھوٹی خوشیوں کو بڑی کامیابی سمجھ لینا اور مستقبل کے ایسے خواب دیکھنا جن میں جدائی کا کوئی تصور ہی نہیں تھا۔ تب کہاں معلوم تھا کہ ایک دن انہی چہروں کو دیکھنے کے لیے آنکھیں ترسیں گی، انہی آوازوں کو سننے کے لیے دل بے قرار ہوگا اور انہی یادوں کے سہارے زندگی کے کئی موسم گزارنے پڑیں گے۔
زندگی نے کچھ لوگوں کو اس طرح چھینا کہ ان کی کمی محض ایک خالی جگہ بن کر نہیں رہ گئی بلکہ شخصیت کے اندر ایک مستقل تبدیلی کا سبب بن گئی۔ کچھ دوستیاں ایسی تھیں جن کا اختتام کسی ناراضی، کسی اختلاف یا کسی غلط فہمی پر نہیں ہوا، بلکہ موت نے ان کے درمیان اپنا آخری فیصلہ سنا دیا۔ پھر انسان چاہ کر بھی کسی کو آواز نہیں دے سکتا، کسی سے شکوہ نہیں کر سکتا اور نہ ہی یہ کہہ سکتا ہے کہ ابھی تو بہت سی باتیں باقی تھیں۔
شاید کسی اپنے کو کھو دینے کا سب سے بڑا دکھ یہی ہے کہ انسان کے پاس کہنے کو بہت کچھ باقی رہ جاتا ہے مگر سننے والا موجود نہیں رہتا
اور پھر کچھ نام ایسے ہوتے ہیں جو وقت کے ساتھ ماضی کا حصہ تو بن جاتے ہیں مگر دل انہیں ماضی تسلیم کرنے پر آمادہ نہیں ہوتا۔ ایک محبت بھی ایسی ہی ہوتی ہے جو جسمانی جدائی کے بعد بھی احساس کی صورت میں کہیں باقی رہ جاتی ہے۔ انسان جانتا ہے کہ وہ شخص اب اس دنیا میں نہیں مگر یادوں کے کسی گوشے میں اس کی موجودگی آج بھی محسوس ہوتی ہے۔ بعض اوقات ایک موسم، کوئی تاریخ، کسی جگہ کا منظر یا کوئی معمولی سی بات برسوں پرانے احساس کو یوں تازہ کر دیتی ہے جیسے ابھی کل ہی کی بات ہو۔
ستمبر کا مہینہ بھی کبھی کبھی محض کیلنڈر کا ایک ورق نہیں رہتا۔ وہ اپنے ساتھ کچھ چہرے، کچھ آوازیں، کچھ ادھورے مکالمے اور کچھ ایسی یادیں لے کر آتا ہے جنہیں وقت کی گرد بھی دھندلا نہیں پاتی۔ لوگ کہتے ہیں وقت ہر زخم بھر دیتا ہے مگر شاید یہ بات مکمل سچ نہیں۔ وقت بعض زخموں کو بھرنے کے بجائے انسان کو ان کے ساتھ جینا سکھا دیتا ہے۔ وہ دکھ کی شدت کم کر سکتا ہے، مگر ہر کمی کو ختم نہیں کر سکتا۔
یہاں ایک سوال جنم لیتا ہے کہ آخر انسان بدلتا کیوں ہے؟
کیا عمر بڑھنے سے شخصیت بدلتی ہے یا زندگی کے تجربات اسے نئی شکل دیتے ہیں؟ کیا ہم خود اپنی مرضی سے بدلتے ہیں یا کچھ واقعات ہمارے اندر ایسی تبدیلیاں پیدا کر دیتے ہیں جن کا ہمیں خود بھی اندازہ نہیں ہوتا؟
شاید انسان صرف وقت گزرنے سے نہیں بدلتا، وہ ان لوگوں کے بچھڑنے سے بھی بدلتا ہے جن کے ساتھ اس نے خود کو مکمل محسوس کیا ہوتا ہے۔ کچھ جدائیاں انسان کی ہنسی کا انداز بدل دیتی ہیں، کچھ اس کی ترجیحات اور کچھ اس کے دیکھنے کا زاویہ۔ جو شخص کبھی ہر بات پر بے ساختہ مسکرا دیتا تھا، وہی ایک دن محفل میں بیٹھ کر بھی خاموش رہنا سیکھ لیتا ہے۔ جو کبھی آنے والے کل کے خواب دیکھا کرتا تھا، وہی کبھی کبھی گزرے ہوئے کل کی ایک جھلک کے لیے ترسنے لگتا ہے۔
یہ تبدیلی ہمیشہ کمزوری نہیں ہوتی۔ بعض اوقات یہ زندگی کو زیادہ گہرائی سے سمجھنے کا نتیجہ ہوتی ہے۔ انسان جان لیتا ہے کہ ہر ملاقات دائمی نہیں، ہر وعدہ ہمیشہ قائم نہیں رہتا اور ہر خوبصورت لمحہ دوبارہ نصیب نہیں ہوتا۔ وہ لوگوں کی موجودگی کی قدر کرنا سیکھتا ہے، لفظوں کے اثرات کو سمجھتا ہے اور بعض اوقات خاموشی کو گفتگو سے زیادہ بامعنی محسوس کرنے لگتا ہے
مگر اس تمام تبدیلی کے باوجود انسان کے اندر ایک حصہ ایسا ضرور باقی رہتا ہے جو اپنے پرانے دنوں میں لوٹنا چاہتا ہے۔ وہی بے فکری، وہی قہقہے، وہی چہرے اور وہی زمانہ جہاں زندگی ابھی اتنی پیچیدہ نہیں ہوئی تھی۔ شاید اسی لیے پرانی تصویریں دیکھتے ہوئے ہم صرف چہروں کو نہیں دیکھتے بلکہ اپنے اس وجود کو بھی تلاش کرتے ہیں جو کبھی ان لوگوں کے درمیان آباد تھا۔
دل کے اندر کی کچھ گلیاں ایسی بھی ہوتی ہیں جہاں ہم برسوں بعد بھی لوٹتے ہیں۔ وہاں نہ کوئی استقبال کرنے والا ہوتا ہے، نہ کوئی آواز دینے والا مگر یادوں کی صورت میں سب کچھ موجود ہوتا ہے۔ کہیں کسی دوست کی ہنسی سنائی دیتی ہے، کہیں کسی اپنے کا لہجہ محسوس ہوتا ہے اور کہیں ایک ایسا چہرہ دکھائی دیتا ہے جسے دوبارہ دیکھنے کی خواہش اب صرف دعا میں ڈھل سکتی ہے۔
ہم شاید اپنے گزرے ہوئے لوگوں کو بھولنے کے لیے نہیں بنے۔ ہم انہیں اپنی یادوں میں جگہ دے کر آگے بڑھنے کے لیے بنے ہیں۔ کیونکہ ہر شخص جو ہماری زندگی میں آتا ہے، اپنے ساتھ کچھ نہ کچھ چھوڑ جاتا ہے۔ کوئی ہمیں محبت کرنا سکھاتا ہے، کوئی دوستی کا مفہوم سمجھاتا ہے، کوئی صبر کا سبق دیتا ہے اور کوئی اپنی جدائی سے ہمیں زندگی کی بے ثباتی کا احساس دلا جاتا ہے۔
وقت آگے بڑھتا رہتا ہے، موسم بدلتے رہتے ہیں، چہرے بدل جاتے ہیں اور زندگی اپنی رفتار سے چلتی رہتی ہے۔ مگر دل کے اندر ایک شہر ایسا بھی ہوتا ہے جہاں کچھ لوگ ہمیشہ اپنی پہلی صورت میں آباد رہتے ہیں۔ وہاں نہ عمر کا اثر ہوتا ہے، نہ وقت کی گرد اور نہ ہی دنیا کے بدلتے ہوئے حالات کا کوئی دخل۔
شاید انسان کی شخصیت بھی انہی گلیوں سے مل کر بنتی ہے۔ وہ صرف ان لوگوں کا مجموعہ نہیں ہوتا جو آج اس کے ساتھ موجود ہیں، بلکہ ان لوگوں کے اثرات بھی اس کے وجود میں شامل ہوتے ہیں جو کبھی اس کی زندگی کا حصہ تھے اور اب صرف یادوں میں باقی ہیں
اور شاید یہی زندگی کا سب سے گہرا المیہ اور خوبصورت حقیقت ہے کہ ہم آگے تو بڑھ جاتے ہیں، مگر اپنے اندر سے کبھی مکمل طور پر کہیں نہیں جاتے۔ کچھ لوگ ہمارے ساتھ نہیں رہتے، لیکن ان کے ساتھ گزارے ہوئے دن ہماری شخصیت میں ہمیشہ زندہ رہتے ہیں۔
دل کے اندر کی گلیاں کبھی مکمل ویران نہیں ہوتیں۔ وہاں کچھ لوگ یاد بن کر، کچھ لمحے احساس بن کر اور کچھ جدائیاں ہماری شخصیت کا حصہ بن کر ہمیشہ آباد رہتی ہیں۔
