میرے رب کے فیصلے کمال ہیں، تحریر: مہوش شفیق

کچھ فیصلے سمجھ نہیں آتے، بس وقت گزرنے کے بعد ان کے پیچھے چھپی حکمت دل پر اترتی ہے۔

کبھی کبھی زندگی ہماری مرضی کے خلاف ایسے موڑ پر لا کھڑا کرتی ہے جہاں نہ واپسی کا راستہ دکھائی دیتا ہے، نہ آگے بڑھنے کی ہمت باقی رہتی ہے۔ ہم اپنے خوابوں کو ٹوٹتے دیکھتی ہیں، اپنی دعاؤں کو خاموشی میں گم ہوتا محسوس کرتی ہیں اور پھر آسمان کی طرف دیکھ کر بس اتنا کہتی ہیں: یا رب! آخر میرے ساتھ ہی کیوں؟

لیکن شاید ہم بھول جاتی ہیں کہ ہم کہانی کا صرف ایک صفحہ پڑھ رہی ہوتی ہیں، جبکہ ہمارا رب پوری کتاب جانتا ہے۔میرے رب کے فیصلے کمال ہیں۔ وہ کبھی کبھی ہماری پسندیدہ چیزوں کو ہم سے دور کر دیتا ہے، کیونکہ وہ جانتا ہے کہ ہر پسندیدہ چیز ہمارے حق میں بہتر نہیں ہوتی۔ کچھ راستے ہمیں منزل تک پہنچانے کے لیے نہیں، بلکہ ہمیں خود سے ملوانے کے لیے ہوتے ہیں۔ کچھ لوگ زندگی میں ہمیشہ رہنے کے لیے نہیں آتے، وہ ہمیں کوئی سبق سکھا کر چلے جاتے ہیں۔ پھر ایک دن ہم اسی اجڑنے کے بعد اپنے اندر ایک نئی دنیا آباد ہوتے دیکھتی ہیں۔

عجیب بات ہے نا؟ جس چیز کے نہ ملنے پر ہم راتوں کو جاگتی ہیں، کچھ عرصے بعد اسی کے نہ ملنے پر رب کا شکر ادا کر رہی ہوتی ہیں۔ جس دروازے کے بند ہونے کو ہم اپنی سب سے بڑی ناکامی سمجھتی ہیں، وقت گزرنے پر معلوم ہوتا ہے کہ شاید وہ دروازہ بند ہونا ہی ہماری سب سے بڑی حفاظت تھی۔اور کبھی ایسا بھی ہوتا ہے کہ ہم کسی چیز کے لیے برسوں دعائیں کرتی ہیں، مگر وہ ہمیں نہیں ملتی۔ ہم سمجھتی ہیں کہ شاید ہماری آواز عرش تک نہیں پہنچ رہی، حالانکہ ممکن ہے کہ ہمارا رب ہمیں سن بھی رہا ہو، ہماری حالت جانتا بھی ہو، مگر ہمیں وہ دینے کے بجائے کسی بہتر وقت اور بہتر نعمت کے لیے تیار کر رہا ہو۔میں نے زندگی سے ایک بات سیکھی ہے: ہر محرومی بدقسمتی نہیں ہوتی، ہر تاخیر انکار نہیں ہوتی، اور ہر ٹوٹنا اختتام نہیں ہوتا۔کبھی رب العزت انسان کو اس کی خواہش سے نہیں، بلکہ اس کی ضرورت سے نوازتا ہے۔ وہ اسے وہاں سے نکال دیتا ہے جہاں وہ خود نکلنے کی ہمت نہیں کر پاتی۔ وہ اس کی زندگی میں ایسے حالات پیدا کرتا ہے جو اس کی انا توڑ دیتے ہیں، اسے اپنی حقیقت دکھاتے ہیں اور اسے اپنے رب کے قریب لے آتے ہیں۔ شاید اسی لیے بعض اوقات زندگی کے سب سے مشکل دن، ہماری روح کے سب سے گہرے سبق بن جاتے ہیں۔ایمان یہ نہیں کہ انسان کبھی ٹوٹے ہی نہ؛ ایمان یہ ہے کہ ٹوٹنے کے بعد بھی اس کا دل اپنے رب سے مایوس نہ ہو۔اب میں ہر بند دروازے پر دستک دینے کی ضد نہیں کرتی۔ ہر بچھڑنے والے کو روکنے کی کوشش نہیں کرتی۔ ہر نامکمل خواہش کو اپنی بدقسمتی نہیں سمجھتی۔ میں بس دعا کرتی ہوں کہ یا رب! جو میرے حق میں بہتر ہے، اسے میرے لیے آسان کر دے، اور جو میرے لیے بہتر نہیں، اس کی محبت میرے دل سے آہستہ آہستہ نکال دے۔کیونکہ اب مجھے یقین ہے کہ میری نظر جہاں ختم ہوتی ہے، وہاں میرے رب کی حکمت ختم نہیں ہوتی۔شاید آج جو بات میرے لیے ایک سوال ہے، کل اسی کا جواب میری زندگی کا سب سے خوبصورت سکون بن جائے۔آخر میں، میں نے اپنے رب سے یہ سیکھا ہے کہ ہر بات کا جواب فوراً ملنا ضروری نہیں، ہر خواہش کا پورا ہونا ضروری نہیں، اور ہر کہانی کا ہماری مرضی کے مطابق ختم ہونا بھی ضروری نہیں۔ ضروری صرف یہ ہے کہ ہم اپنے رب کی رحمت سے امید نہ چھوڑیں ۔اور جب کبھی زندگی میری سمجھ سے باہر ہو جاتی ہے، تو میں خود کو بس ایک بات یاد دلاتی ہوں:

"میں اپنے کل سے بے خبر ہوں، مگر میرا رب میرے کل کو جانتا ہے۔ پھر میں اپنے آج سے اتنا پریشان کیوں ہوں؟"

ہر اس چیز پر جو ملی، ہر اس چیز پر جو نہ ملی، اور ہر اس چیز پر جس کی حکمت ابھی سمجھ نہیں آئی۔