دل زندہ ہوں تو ۔ تحریر: محمد ہشام علی ہاشمی

کہتے ہیں کہ کسی شہر کی ویرانی دیکھنی ہو تو اس کی ٹوٹی ہوئی سڑکیں یا گرے ہوئے مکان مت دیکھو، بلکہ وہاں بسنے والوں کی آنکھوں میں جھانک کر دیکھو۔ اگر آنکھوں میں امید کی چمک اور چہروں پر اپنائیت کی مسکراہٹ ہے، تو یقین جانیں وہ شہر کھنڈر ہو کر بھی "آباد" ہے اور اگر یہ نہیں، تو فلک بوس عمارتوں کے درمیان بھی "ویرانی" کا راج ہے۔

آج کے دور کا المیہ یہ ہے کہ ہم نے "ترقی" کا مطلب صرف کنکریٹ کے جنگل، چوڑی سڑکیں اور شیشے کے دفاتر سمجھ لیا ہے۔ ہم سمجھتے ہیں کہ اگر شہر میں ٹریفک کا شور ہے تو شہر زندہ ہے۔ لیکن سچ تو یہ ہے کہ شہر شور سے نہیں، شعور اور احساس سے زندہ ہوتے ہیں۔

تاریخ گواہ ہے کہ دنیا کے وہ شہر ہمیشہ یاد رکھے گئے جہاں کے باشندے "زندہ دل" تھے۔ بغداد کی گلیاں ہوں، دہلی کے پرانے کوچے ہوں یا اندرونِ لاہور کے چوبارے ان جگہوں کی کشش ان کی عمارتوں میں نہیں بلکہ وہاں کے لوگوں کے رویوں میں تھی۔ وہ وقت تھا جب ہمسایہ صرف ہمسایہ نہیں، بلکہ خاندان کا حصہ ہوتا تھا۔ جب ایک گھر میں کھانا پکتا تھا تو خوشبو سات گھروں تک جاتی تھی اور اگر کسی ایک گھر میں غم ہوتا تھا تو پورا محلہ سوگوار ہوتا تھا۔

یہ وہ زندہ دلی تھی جس نے شہروں کو آباد رکھا ہوا تھا۔ جب دل زندہ ہوتے ہیں تو دروازے کھلے رہتے ہیں۔ جب دل مردہ ہو جائیں تو بڑی بڑی کوٹھیوں کے گیٹ پر بھی '' کتا ہے، ہوشیار رہیں'' کی تختیاں لٹک جاتی ہیں۔

آج ہمارے شہروں کی آبادی لاکھوں اور کروڑوں میں ہے، لیکن عجیب تماشا ہے کہ انسانوں کے اس ٹھاٹھیں مارتے سمندر میں ہر شخص تنہا ہے۔ ہم ایک ہی اپارٹمنٹ بلڈنگ میں رہتے ہیں لیکن یہ نہیں جانتے کہ دیوار کی دوسری طرف کون بس رہا ہے۔ ہمارے پاس "کنکشنز" (Connections) تو بہت ہیں مگر "تعلق" (Relation) کوئی نہیں۔

جب دلوں میں بے حسی ڈیرے ڈال لے، تو شہر خود بخود اجڑنے لگتے ہیں۔ پھر بازاروں میں رونق تو ہوتی ہے مگر برکت نہیں ہوتی۔ سڑکوں پر ہجوم تو ہوتا ہے مگر قافلہ نہیں ہوتا۔ پھر شہر خوف کا منظر پیش کرنے لگتے ہیں جہاں ہر شخص دوسرے سے ڈر رہا ہوتا ہے۔ یہ وہ ویرانی ہے جو آبادی کے بیچوں بیچ جنم لیتی ہے۔

سوال یہ ہے کہ دل زندہ کیسے ہوتے ہیں؟ دل تب زندہ ہوتے ہیں جب ہم اپنے لیے جینا چھوڑ کر دوسروں کے لیے جینا سیکھتے ہیں۔ جب ٹریفک سگنل پر رک کر ہم راستہ دیتے ہیں، جب ہم کسی اجنبی کو دیکھ کر مسکراتے ہیں، جب ہم اپنی خوشی سے پہلے دوسرے کی ضرورت کو ترجیح دیتے ہیں۔

کسی شہر کو آباد کرنے کے لیے میئر یا حکومت کی ضرورت بعد میں پڑتی ہے، پہلے "شہری" کی ضرورت ہوتی ہے۔ ایک ایسا شہری جس کا ضمیر جاگ رہا ہو اور جس کا دل دھڑک رہا ہو۔

اگر ہم اپنے کوڑے کو سڑک پر پھینکنے سے گریز کرتے ہیں، تو ہمارا دل زندہ ہے۔

اگر ہم کسی بزرگ کو کھڑا دیکھ کر اپنی سیٹ چھوڑ دیتے ہیں، تو ہمارا دل زندہ ہے۔

اگر ہم اپنے شہر کے درختوں، پرندوں اور جانوروں کا خیال رکھتے ہیں، تو ہمارا شہر کبھی ویران نہیں ہو سکتا۔

عمارتیں بنانا آسان ہے، لیکن معاشرہ بنانا مشکل۔ شہروں کی خوبصورتی اس کی لائٹوں اور فواروں میں نہیں، بلکہ اس کے شہریوں کے اخلاق میں پوشیدہ ہے۔

اگر آپ چاہتے ہیں کہ آپ کا شہر دنیا کا بہترین شہر بنے، تو اس کی شروعات "میونسپلٹی" سے نہیں، اپنے "دل" سے کریں۔ اپنی سوچ سے گرد ہٹائیں، اپنے لہجے میں مٹھاس گھولیں اور بے غرض ہو کر محبت بانٹیں۔ آپ دیکھیں گے کہ ویران گلیاں بھی قہقہوں سے گونج اٹھیں گی۔

کیونکہ یہ ایک اٹل حقیقت ہے کہ جب مکینوں کے دل زندہ ہو جائیں، تو شہروں کو آباد ہونے کے لیے کسی نقشے یا بجٹ کی ضرورت نہیں رہتی، وہ خود بخود جنت کا نقشہ بن جاتے ہیں۔