لاہور:گوگل کے زیرِ اہتمام پاکستان کی ایپس اورگیمنگ انڈسٹری کو فروغ دینے کے لیے تھنک ایپس کا انعقاد
لاہور:گوگل کاتھنک ایپس 2026 لاہور کےشاہی قلعےمیں منعقد ہوا،جہاں پاکستان کی ایپ اور گیمنگ انڈسٹری سے وابستہ افراد نےشرکت کی،یونیسکو کے عالمی ثقافتی ورثےمیں شامل شاہی قلعےمیں ہونےوالی اس تقریب کامقصد تاریخی ورثے کو جدید ٹیکنالوجی کےساتھ جوڑتےہوئےمستقبل کے ڈیجیٹل رجحانات اور مواقع کو اجاگر کرنا تھا۔
لاہورمیں گوگل کے زیر اہتمام تھنک ایپس 2026 (Think Apps 2026) کا انعقاد ہوا،جس میں پاکستان کے نمایاں ایپ ڈویلپرز سمیت عالمی اور علاقائی انڈسٹری کے رہنماؤں اور ماہرین نے شرکت کی۔ اس تقریب میں پاکستان کے نامور ڈویلپرز شریک ہوئے۔ ایپس اور گیمنگ کی انڈسٹری کے اس سال کے سب سے بڑے ایونٹ میں اس بات پر توجہ مرکوز کی گئی کہ مصنوعی ذہانت (AI) پاکستانی اسٹوڈیوز کو عالمی مارکیٹ میں پائیدار ترقی حاصل کرنے میں کس طرح مدد دے سکتی ہے۔
پاکستانی ایپ اور گیمنگ اسٹوڈیوز عالمی سطح پر اپنی پہچان تیزی سے مستحکم کر رہے ہیں اور ملک سے باہر بھی لاکھوں صارفین تک رسائی حاصل کر رہے ہیں، صرف گزشتہ 12 ماہ کے دوران مقامی ڈویلپرز کی تیار کردہ مصنوعات کو دنیا بھرمیں 4.6 ارب مرتبہ ڈاؤن لوڈ کیا گیا،عالمی سطح پر بڑھتی ہوئی یہ رسائی پاکستان کی ڈیجیٹل برآمدات میں اضافے کے لیے مضبوط بنیاد فراہم کرتی ہے۔ خصوصاً مصنوعی ذہانت میں تیز رفتار پیشرفت مقامی ڈویلپرز کے لیے اپنے کاروبار کو وسعت دینے، جدت لانے اور عالمی سطح پر مقابلہ کرنے کے نئے اور غیر معمولی مواقع پیدا کر رہی ہے۔
تقریب کےدوران ماہرین نےمصنوعی ذہانت کے ایسے قابلِ عمل ٹولز، ترقی کی حکمتِ عملیوں اور آمدنی کے مؤثر ماڈلز پر روشنی ڈالی جو اسٹوڈیوزکو اپنے پروڈکشن کے عمل کومؤثر بنانے،صارفین کی دلچسپی اور شمولیت بڑھانے اور زیادہ تجارتی مواقع کی حامل عالمی مارکیٹ تک رسائی حاصل کرنے میں مدد دے سکتے ہیں۔ پاکستان کی ڈیجیٹل برآمدات کا نیا دور ابتدائی طور پر 30 سے بھی کم افراد پر مشتمل اس صنعت کا دائرہ اب وسیع ہو چکا ہےاور یہ 30 ہزار سے زائد پیشہ ور افراد کی معاونت کر رہی ہے۔ یہ اعداد و شمار مقامی صلاحیتوں کے اس وسیع ذخیرے کی عکاسی کرتے ہیں، جس کی مدد سے عالمی صارفین کے لیے ڈیجیٹل مصنوعات تیار کی جا رہی ہیں۔ گیم ڈسٹرکٹ (Game District) اور فن سول (Funsol) جیسے سرکردہ اسٹوڈیوز ایک پُرعزم ڈیجیٹل ایکو سسٹم کی مثال ہیں، جس کی رسائی اور ترقی کا وژن پاکستان کی مقامی مارکیٹ سے کہیں آگے تک پھیلا ہوا ہے۔
پاکستان، فلپائن، تھائی لینڈ اور فرنٹیئر مارکیٹس کے لیے گوگل کے کلسٹر ڈائریکٹر فرحان قریشی لاہور میں تھنک ایپس 2026 سے خطاب کرتے ہوئے اس بات پر روشنی ڈال رہے ہیں کہ مصنوعی ذہانت کس طرح پاکستانی ڈویلپرز کو عالمی سطح پر مسابقتی کاروبار قائم کرنے اور ایک پائیدار ڈیجیٹل ورثہ تشکیل دینے میں مدد دے سکتی ہے۔
گوگل کےپاکستان،فلپائن، تھائی لینڈ اور فرنٹیئر مارکیٹس کےکلسٹرڈائریکٹرفرحان قریشی نےکہا، ’’پاکستانی ڈویلپرز کی عالمی سطح پر کامیابیاں ان کی اعلیٰ صلاحیتوں اور بلند عزائم کی عکاسی کرتی ہیں، جو ملک کے مقامی ڈیجیٹل ایکو سسٹم کو آگے بڑھا رہے ہیں۔ ڈویلپرز کو مصنوعی ذہانت کی جدید ترین صلاحیتوں سے لیس کرکے ہمارا مقصد اس پیش رفت کو مزید تیز کرنا ہے، تاکہ مقامی اسٹوڈیوز ایسی مصنوعات تیار کر سکیں جو عالمی سطح پر اپنی جگہ بنائیں، کاروبار کو پائیدار ترقی دیں اور عالمی ڈیجیٹل معیشت میں پاکستان کی حیثیت کو مزید مستحکم کریں۔‘‘
