انسان کی زندگی بھی موسموں کی طرح تغیر پذیر ہے۔ کبھی خوشیوں کی دھوپ اسے اپنے حصار میں لے لیتی ہے تو کبھی غموں کے بادل اس کے وجود پر سایہ فگن ہو جاتے ہیں۔ کبھی حالات سازگار ہوتے ہیں تو کبھی وقت ایسے امتحانات سے دوچار کر دیتا ہے کہ انسان اپنے ہی وجود سے سوال کرنے لگتا ہے۔ زندگی کا یہی اتار چڑھاؤ دراصل اس کا حسن ہے، لیکن ان تمام کیفیات کے درمیان ایک سوال ہمیشہ اپنی جگہ قائم رہتا ہے کہ آخر ہم بدلتے کیوں نہیں؟
بات دراصل یہ ہے کہ ہم خود کو بدلنا ہی نہیں چاہتے، ورنہ تبدیلی تو ایک فطری عمل ہے۔ قدرت نے ہمیں چار موسموں سے نوازا ہے۔ کبھی موسمِ سرما کی یخ بستہ ہوائیں جسم کو ٹھٹھرا دیتی ہیں تو کبھی گرمی کی شدت وجود کو پسینے سے شرابور کر دیتی ہے۔ کبھی بہار کی آمد درختوں پر نئے پتے اور پھول کھلا دیتی ہے تو کبھی خزاں کے موسم میں یہی درخت اپنے وجود سے زرد پتے جدا کر دیتے ہیں۔ قدرت کا یہ نظام ہمیں ہر لمحہ ایک خاموش پیغام دیتا ہے کہ زندگی میں کوئی کیفیت مستقل نہیں ہوتی۔ ہر موسم اپنے ساتھ ایک نئی تبدیلی، ایک نیا رنگ اور ایک نیا امکان لے کر آتا ہے۔ درخت جب اپنے پرانے پتے گراتے ہیں تو اس کا مطلب یہ نہیں ہوتا کہ ان کا وجود ختم ہو رہا ہے، بلکہ وہ آنے والی بہار کے استقبال کی تیاری کر رہے ہوتے ہیں۔ بالکل اسی طرح انسان کو بھی اپنی زندگی میں بعض پرانی سوچوں، رویوں اور عادتوں سے دست بردار ہونا پڑتا ہے تاکہ وہ ایک بہتر شخصیت کے طور پر سامنے آ سکے۔
بے شک قدرت ہر چیز پر قادر ہے۔ موسموں کا بدلنا جہاں قدرت کے حسن کا مظہر ہے، وہیں انسان کے لیے بھی ایک سبق ہے کہ جمود کبھی ترقی کا راستہ نہیں بن سکتا۔ وقت کے ساتھ خود کو بدلنا، اپنی سوچ میں وسعت پیدا کرنا اور حالات کے مطابق اپنے رویوں میں بہتری لانا کمزوری نہیں بلکہ شعور کی علامت ہے۔ جو انسان وقت کے تقاضوں کو سمجھ لیتا ہے، وہ زندگی کے نشیب و فراز میں خود کو سنبھالنے کا ہنر بھی سیکھ لیتا ہے۔
اسلام بھی انسان کو اپنی اصلاح، اچھے اعمال اور حسنِ اخلاق کی تعلیم دیتا ہے۔
رسول اللہ ﷺ نے ارشاد فرمایا:
ترجمہ: تم جہاں کہیں بھی ہو اللہ سے ڈرو، برائی کے بعد نیکی کرو جو اسے مٹا دے اور لوگوں کے ساتھ اچھے اخلاق سے پیش آؤ۔
(جامع ترمذی: 1987، حدیث حسن صحیح)
اس فرمانِ نبوی ﷺ میں ہماری پوری زندگی کے لیے ایک خوب صورت رہنمائی موجود ہے۔ انسان سے غلطی ہو سکتی ہے، لیکن اصل کامیابی یہ ہے کہ وہ اپنی غلطی کا ادراک کرے، اس کی اصلاح کرے اور اپنے کردار کو بہتر بنانے کی کوشش جاری رکھے۔ اچھا انسان وہ نہیں جو کبھی غلطی نہ کرے، بلکہ وہ ہے جو اپنی غلطیوں سے سیکھنے اور خود کو سنوارنے کا حوصلہ رکھتا ہو۔
مگر ہمارا المیہ یہ ہے کہ ہم تبدیلی کی خواہش تو رکھتے ہیں، لیکن اپنی ذات میں تبدیلی لانے کے لیے آمادہ نہیں ہوتے۔ ہم چاہتے ہیں کہ ہمارے حالات بدل جائیں، لوگ ہمارے مطابق ہو جائیں، رشتوں میں پہلے جیسی محبت لوٹ آئے اور معاشرے کا رویہ تبدیل ہو جائے، لیکن جب بات اپنے رویے، اپنی سوچ اور اپنی غلطیوں کی اصلاح کی آتی ہے تو ہم ہزار تاویلیں پیش کرنے لگتے ہیں۔ ہمیں دوسروں کی خامیاں تو بہت جلد دکھائی دے جاتی ہیں، مگر اپنی ذات کا محاسبہ کرنے کی فرصت نہیں ملتی۔ ہم دوسروں سے برداشت، خلوص، محبت اور احترام کی توقع رکھتے ہیں، لیکن خود ان خوبیوں کو اپنانے میں کوتاہی برتتے ہیں۔
تبدیلی کا مطلب اپنی پہچان کھو دینا یا اپنے اصولوں سے انحراف کرنا ہرگز نہیں، بلکہ اس کا اصل مفہوم اپنی شخصیت کو بہتر بنانا ہے۔ اپنی اصول پسندی برقرار رکھتے ہوئے رویوں میں نرمی پیدا کرنا، اپنی خودداری کے ساتھ دوسروں کے لیے گنجائش پیدا کرنا، اختلافِ رائے کو برداشت کرنا اور اپنی غلطی تسلیم کرنے کا حوصلہ پیدا کرنا بھی تبدیلی ہی کی صورتیں ہیں۔ ہر بات پر ضد کرنا، ہر اختلاف کو دشمنی سمجھنا اور ہر تنقید کو اپنی توہین تصور کرنا کسی مضبوط شخصیت کی علامت نہیں۔
زندگی دراصل ایک مسلسل تربیتی عمل ہے۔ یہ ہمیں ہر روز کچھ نہ کچھ سکھاتی ہے۔ کبھی کسی کی بے رخی ہمیں اپنے رویے پر غور کرنے کا موقع دیتی ہے، کبھی کسی کی جدائی ہمیں رشتوں کی قدر سکھاتی ہے، کبھی ناکامی ہماری صلاحیتوں کو پہچاننے کا حوصلہ دیتی ہے اور کبھی کامیابی ہمیں عاجزی کا سبق پڑھاتی ہے۔ بعض اوقات زندگی کے تلخ تجربات انسان کی سوچ بدل دیتے ہیں، لیکن ضروری نہیں کہ ہر شخص ان تجربات سے سبق بھی حاصل کرے۔ کچھ لوگ حالات سے سیکھ کر اپنی شخصیت میں نکھار پیدا کر لیتے ہیں، جبکہ کچھ لوگ تمام عمر دوسروں کو قصوروار ٹھہراتے رہتے ہیں۔ فرق صرف سوچ کا ہوتا ہے۔
آخرکار سوال پھر وہی ہے کہ ہم بدلتے کیوں نہیں؟ شاید اس لیے کہ ہمیں اپنی غلطیوں سے زیادہ دوسروں کی غلطیاں دکھائی دیتی ہیں۔ ہمیں اپنی انا عزیز ہے، اپنی ضد پیاری ہے اور اپنی سوچ کو حرفِ آخر سمجھنے کی عادت ہے۔ ہم چاہتے ہیں کہ زندگی ہمارے لیے بدلے، لوگ ہمارے لیے اپنے رویے تبدیل کریں اور حالات ہماری خواہشات کے مطابق ڈھل جائیں، مگر خود زندگی کے ساتھ بدلنے پر آمادہ نہیں ہوتے۔ حالانکہ تبدیلی کا آغاز ہمیشہ اپنی ذات سے ہوتا ہے۔ جب انسان اپنے رویے، اپنی سوچ اور اپنے طرزِ عمل کا جائزہ لینا شروع کر دیتا ہے تو اس کی زندگی میں بہتری کے امکانات پیدا ہونے لگتے ہیں۔
قدرت کے موسم ہمیں یہی سبق دیتے ہیں کہ ہر تبدیلی اپنے اندر ایک نیا امکان رکھتی ہے۔ خزاں کے بعد بہار کا آنا اس بات کی علامت ہے کہ اختتام ہمیشہ محرومی نہیں ہوتا، بعض اوقات وہ ایک نئے آغاز کا پیش خیمہ بھی ہوتا ہے۔ اس لیے ہمیں اپنی زندگی میں آنے والی تبدیلیوں سے خوف زدہ ہونے کے بجائے انہیں سمجھنے اور قبول کرنے کا ہنر سیکھنا چاہیے۔
کیونکہ زندگی صرف وقت گزرنے کا نام نہیں بلکہ وقت کے ساتھ سیکھنے، سنورنے اور اپنی ذات کو بہتر بنانے کا نام بھی ہے۔ دوسروں سے تبدیلی کی توقع رکھنے سے پہلے اگر ہم خود کو بدلنے کا حوصلہ پیدا کر لیں تو شاید ہمارے رویے، ہمارے رشتے اور ہمارا معاشرہ پہلے سے کہیں بہتر ہو جائیں۔ آخر تبدیلی کا آغاز کسی دوسرے سے نہیں، ہمیشہ اپنی ذات سے ہوتا ہے۔
مزید پڑھیں





