جمعرات، 19 نومبر، 2026
Baaghi TV Logo
ٹرینڈنگ

صدر زرداری اور وزیراعظم کی اہم ملاقات، سیاسی و قومی معاملات اتفاق رائے سے حل کرنے پر اتفاق


صدر مملکت آصف علی زرداری اور وزیراعظم شہباز شریف کے درمیان جمعرات کی شب ایوان صدر میں اہم ملاقات ہوئی، جس میں ملک کی موجودہ سیاسی صورتحال، قومی امور اور مشرق وسطیٰ کی تازہ صورتحال کا تفصیلی جائزہ لیا گیا۔ ملاقات میں اس بات پر اتفاق کیا گیا کہ تمام قومی اور سیاسی معاملات محاذ آرائی کے بجائے بات چیت، باہمی مشاورت اور اتفاق رائے سے حل کیے جائیں گے۔

ایوان صدر کی جانب سے سماجی رابطے کی ویب سائٹ ایکس پر جاری بیان کے مطابق ملاقات میں وزیر داخلہ محسن نقوی بھی شریک تھے۔ اس موقع پر ملک کی مجموعی صورتحال اور موجودہ سیاسی حالات پر تفصیلی تبادلہ خیال کیا گیا۔

ملاقات کے دوران اس عزم کا اظہار کیا گیا کہ تمام متعلقہ فریق مل بیٹھ کر مسائل کا جائزہ لیں گے اور باہمی مشاورت کے ذریعے ان کا قابل قبول حل تلاش کریں گے۔ شرکا نے اس بات پر زور دیا کہ کسی بھی قومی یا سیاسی معاملے کو یکطرفہ طور پر آگے بڑھانے کے بجائے تمام متعلقہ فریقوں کو اعتماد میں لے کر فیصلے کیے جائیں۔

ایوان صدر کے مطابق ملاقات میں سابقہ آئینی ترامیم کا حوالہ دیتے ہوئے کہا گیا کہ یہ ترامیم تمام اتحادی جماعتوں کی باہمی مشاورت اور اتفاق رائے سے مکمل کی گئی تھیں۔ اس بات پر بھی اتفاق کیا گیا کہ آئندہ اہم قومی اور سیاسی معاملات پر اتحادی جماعتوں کو اعتماد میں لیا جائے گا اور تمام امور مشترکہ مشاورت سے آگے بڑھائے جائیں گے۔

صدر مملکت اور وزیراعظم نے اس مؤقف کا اعادہ کیا کہ قومی معاملات میں باہمی افہام و تفہیم اور مذاکرات کو ترجیح دی جائے گی اور تمام متعلقہ فریقوں کو ساتھ بٹھا کر مسائل کا حل تلاش کیا جائے گا۔

ملاقات میں مشرق وسطیٰ کی تازہ صورتحال پر بھی تبادلہ خیال کیا گیا اور خطے میں جاری حالات سے متعلق اہم امور کا جائزہ لیا گیا۔ دونوں رہنماؤں نے اس عزم کا اظہار کیا کہ ملک کے اہم معاملات پر مشترکہ حکمت عملی اور مشاورت کے ذریعے پیش رفت کی جائے گی۔