پنجاب میں بدلتی سیاست،تحریر:راؤ غلام مصطفی

وزیراعلیٰ مریم نواز کی حکومت کے مستقبل، مسلم لیگ (ن) کے اندرونی معاملات اور صوبے میں ممکنہ نئے سیاسی بندوبست کی بازگشت نے ایک نئی بحث کو جنم دیاہے۔ سابق وزیراعلیٰ پنجاب اور تحریک انصاف کے مرکزی صدر چوہدری پرویز الٰہی تقریباً ایک سال کی خاموشی کے بعد دوبارہ سیاسی سرگرمیوں میں دکھائی دے رہے ہیں۔ 12 نومبر کو تحریک انصاف کے ارکانِ قومی و صوبائی اسمبلی سے ان کی ملاقات اور سیاسی صورتِ حال پر مشاورت کو محض ایک معمول کی ملاقات قرار دینا شاید درست نہ ہو۔ دوسری طرف 28ویں آئینی ترمیم کے لیے دو تہائی اکثریت کا مسئلہ بھی حکمران اتحاد کے سامنے ایک بڑا سوال بن کر کھڑا ہے۔ کیا پنجاب میں نئے سیاسی بندوبست کی بازگشت اور پرویز الٰہی کی اچانک سیاسی سرگرمیوں کا تعلق اسی وسیع تر آئینی حکمت عملی سے ہے؟ کیا مسلم لیگ (ن) کو سیاسی دباؤ میں لا کر ایسی صورتِ حال پیدا کی جا رہی ہے جس میں وہ مجوزہ آئینی ترمیم کی منظوری کے لیے زیادہ سے زیادہ سیاسی قوتیں ساتھ ملانے پر مجبور ہو؟ یہ سوالات اپنی جگہ اہم ہیں، کیونکہ دو تہائی اکثریت کے بغیر آئینی ترمیم کی منظوری ممکن نہیں۔ تاہم ان تمام سرگرمیوں کو کسی ایک طے شدہ منصوبے کا حصہ قرار دینے کے لیے ابھی ٹھوس شواہد سامنے نہیں آئے۔سوال یہ ہے کہ کیا پنجاب میں محض انتظامی تبدیلیوں کی تیاری ہو رہی ہے یا اقتدار کی بساط پر کوئی نئی چال چلنے والی ہے؟اس بحث کو اس وقت غیر معمولی اہمیت حاصل ہوئی جب وفاقی وزیر دفاع خواجہ آصف نے 6 نومبر کو ایک ٹی وی پروگرام میں پنجاب میں متبادل انتظام کی کوششوں کا انکشاف کیا۔ ان کے مطابق بعض حلقے موجودہ حکومتی شخصیات کو متنازع بنا کر ایک نئی ٹیم سامنے لانے کے لیے ماحول ہموار کر رہے ہیں۔ انہوں نے بعض بااثر اور صاحبِ ثروت افراد کی گزشتہ چھ سے آٹھ ماہ سے جاری سرگرمیوں کی طرف بھی اشارہ کیا۔ اگرچہ انہوں نے کسی منصوبے یا کردار کی واضح نشاندہی نہیں کی، تاہم ان کے بیان نے پنجاب کی سیاست میں جاری قیاس آرائیوں کو تقویت ضرور دی۔دوسری جانب مسلم لیگ (ق) کے رہنما اور وفاقی وزیر چوہدری سالک حسین کے پنجاب حکومت سے متعلق اعتراضات نے بھی حکومتی اتحاد کے اندرونی اختلافات کو نمایاں کیا ہے۔ بدعنوانی کی شکایات، سرکاری اخراجات اور حکومتی کارکردگی پر سوالات اٹھانے کے بعد وزیراعلیٰ مریم نواز کی جانب سے انہیں پانچ ارب روپے کا ہتکِ عزت نوٹس بھجوایا گیا۔ چوہدری سالک حسین کا اپنے مؤقف پر قائم رہنا اس امر کی نشاندہی کرتا ہے کہ معاملہ محض بیانات کی حد تک محدود نہیں رہا بلکہ سیاسی تعلقات میں تناؤ بھی پیدا ہوا ہے۔چوہدری خاندان پنجاب کی سیاست میں ایک تاریخی اور مؤثر حیثیت رکھتا ہے۔ چوہدری شجاعت حسین، چوہدری پرویز الٰہی اور چوہدری شافع حسین کے مختلف سیاسی کردار اس خاندان کی سیاسی اہمیت کو مزید نمایاں کرتے ہیں۔ ایسے میں حکومتی اتحاد کے اندر پیدا ہونے والی کسی بھی کشیدگی کو معمولی اختلاف سمجھ کر نظرانداز نہیں کیا جا سکتا۔اس تمام صورتِ حال میں وزیراعلیٰ مریم نواز کا 10 نومبر کو جہلم میں خطاب بھی خصوصی اہمیت رکھتا ہے۔ انہوں نے اپنی تقریر میں کہا کہ انہیں بدنام کرنے اور ان کی ساکھ متاثر کرنے کی کوششیں کی جا رہی ہیں، انہیں معلوم ہے کہ یہ باتیں کہاں سے اٹھائی جا رہی ہیں اور کون ان کے پیچھے سرگرم ہے۔ ان کا یہ بیان سیاسی منظرنامے میں ایک اہم اشارہ سمجھا جا رہا ہے۔ دلچسپ امر یہ ہے کہ اس سے قبل خواجہ آصف بھی موجودہ حکومتی شخصیات کو متنازع بنا کر نئی ٹیم سامنے لانے کی کوششوں کا ذکر کر چکے ہیں۔ یوں ایک طرف وفاقی وزیر دفاع کی جانب سے متبادل بندوبست کی بازگشت اور دوسری طرف خود وزیراعلیٰ کا اپنی ساکھ کے خلاف سرگرمیوں کا ذکر، پنجاب کی سیاست میں جاری بے چینی کو مزید نمایاں کرتا ہے۔ تاہم ان بیانات سے کسی منظم منصوبے یا اس کے کرداروں کی حتمی تصدیق نہیں ہوتی۔ادھر پنجاب میں بیوروکریسی کی سطح پر ہونے والی حالیہ تبدیلیوں نے بھی سیاسی حلقوں کو سوچنے پر مجبور کیا ہے۔ نومبر کے پہلے ہفتے میں متعدد اعلیٰ افسران کے تبادلے کیے گئے۔ سیکرٹری ہاؤسنگ کیپٹن (ر) نورالامین مینگل کو عہدے سے ہٹانے سمیت کمشنر لاہور اور دیگر اہم انتظامی عہدوں پر تبدیلیاں عمل میں آئیں۔ ان اقدامات کو انتظامی ضرورت قرار دیا جا سکتا ہے، لیکن جب یہ تبدیلیاں سیاسی اختلافات اور متبادل حکومتی بندوبست کی خبروں کے ساتھ سامنے آئیں تو ان کے سیاسی مضمرات پر بحث فطری امر بن جاتی ہے۔ البتہ افسران کے تبادلے بذاتِ خود کسی حکومت کی تبدیلی کا ثبوت نہیں ہوتے۔پنجاب کی سیاست کا ایک اہم پہلو مسلم لیگ (ن) کی مرکزی قیادت کا کردار بھی ہے۔ نواز شریف، وزیراعظم شہباز شریف اور مریم نواز کے سیاسی و انتظامی کردار اپنی اپنی جگہ اہمیت رکھتے ہیں۔ اگر مستقبل میں کابینہ میں ردوبدل، اتحادیوں کو زیادہ نمائندگی یا انتظامی ٹیم کی ازسرنو تشکیل کا فیصلہ ہوتا ہے تو اسے لازماً وزیراعلیٰ کی تبدیلی قرار نہیں دیا جا سکتا۔ سیاست میں بعض اوقات اقتدار کے چہرے وہی رہتے ہیں، مگر اختیارات کی تقسیم اور حکومتی ترجیحات تبدیل ہو جاتی ہیں۔تاہم اقتدار کی اس ساری کشمکش میں اصل سوال عوامی مسائل کا ہے۔ مہنگائی، بے روزگاری، کسانوں کی مشکلات، تعلیم و صحت کی زبوں حالی اور بلدیاتی اداروں کی غیر یقینی صورتِ حال ایسے مسائل ہیں جن کا حل سیاسی بیانات سے نہیں بلکہ عملی اقدامات سے ممکن ہے۔ عوام کو اس بات سے زیادہ غرض ہے کہ ان کے حالات بدل رہے ہیں یا نہیں، انہیں بنیادی سہولتیں میسر ہیں یا نہیں اور حکومتی دعوے عملی زندگی میں کتنی حقیقت رکھتے ہیں۔فی الحال پنجاب میں کسی نئے وزیراعلیٰ یا متبادل حکومت کے قیام کا کوئی باضابطہ اعلان سامنے نہیں آیا۔ تاہم خواجہ آصف کے بیان، چوہدری سالک حسین کے اعتراضات، مریم نواز کے خطاب اور انتظامی تبدیلیوں نے ایک ایسا سیاسی ماحول ضرور پیدا کر دیا ہے جس میں مستقبل کے امکانات پر گفتگو جاری ہے۔سیاست شطرنج کی وہ بساط ہے جہاں ہر چال کے پیچھے کوئی نہ کوئی حکمتِ عملی ہوتی ہے۔مگر ہر افواہ فیصلہ اور ہر اشارہ حقیقت نہیں بن جاتا۔ پنجاب کا آئندہ سیاسی منظرنامہ اس بات سے متعین ہوگا۔کہ حکمران جماعت اپنے اتحادیوں کے تحفظات کس حد تک دور کرتی ہے، اندرونی اختلافات کو کیسے سنبھالتی ہے اور عوامی اعتماد برقرار رکھنے کے لیے کیا عملی راستہ اختیار کرتی ہے۔