برطانوی شہزادی کے والد بچوں کے جنسی استحصال پر مبنی تصاویر رکھنے کے الزام میں زیرِ تفتیش

برطانیہ کی شہزادی میگھن مارکل کے والد تھامس مارکل کے خلاف فلپائن کی پولیس بچوں کے جنسی استحصال پر مبنی تصاویر گھر میں رکھنے کے الزامات کی تحقیقات کر رہی ہے۔ تھامس مارکل نے الزامات کی تردید کرتے ہوئے انہیں ’’بیمار ذہن کی جھوٹی باتیں‘‘ قرار دیا ہے۔

برطانوی نشریاتی ادارے اسکائی نیوز کے مطابق میگھن مارکل نے اپنے والد کے خلاف سامنے آنے والے الزامات پر گہرے دکھ اور تشویش کا اظہار کرتے ہوئے کہا ہے کہ ان کی ہمدردیاں ان تمام بچوں کے ساتھ ہیں جنہیں ممکنہ طور پر نقصان پہنچایا گیا ہو۔میگھن مارکل نے اپنے بیان میں انکشاف کیا کہ 2018 میں لندن کی میٹروپولیٹن پولیس اور شاہی خاندان کے تحفظ کے ذمہ دار ادارے کو ایک خط بھیجا گیا تھا، جو بعد میں ان کے ساتھ بھی شیئر کیا گیا۔ ان کے مطابق خط میں ان کے والد کے حوالے سے تشویش ناک الزامات عائد کیے گئے تھے اور انہیں یقین دہانی کرائی گئی تھی کہ معاملے کی تحقیقات کی جا رہی ہیں۔

اسکائی نیوز کے مطابق میٹروپولیٹن پولیس نے ماضی میں بھی تھامس مارکل کے خلاف تحقیقات نہیں کیں اور فی الحال بھی اس معاملے کی تحقیقات نہیں کر رہی۔ تاہم پولیس اس بات کی تصدیق کے لیے داخلی انکوائری کر رہی ہے کہ آیا 2018 کا خط شاہی تحفظ کے یونٹ کو موصول ہوا تھا یا نہیں۔میگھن مارکل نے مزید کہا کہ والد سے دوری اختیار کرنے اور اپنے بچوں سے ان کا رابطہ نہ ہونے دینے کا فیصلہ صرف بچوں کے تحفظ کے لیے کیا گیا تھا۔ انہوں نے امید ظاہر کی کہ اب اس فیصلے کی وجوہات کو سمجھا جائے گا اور معصوم بچوں کی حفاظت کو ترجیح دیتے ہوئے انصاف کے تقاضے پورے کیے جائیں گے۔

برطانوی اخبار دی سن کی رپورٹ کے مطابق میگھن کے سوتیلے بھائی تھامس مارکل جونیئر نے دعویٰ کیا تھا کہ انہوں نے فلپائن میں اپنے والد کی سابقہ رہائش گاہ سے مبینہ طور پر ایسی تصاویر کا ذخیرہ دریافت کیا تھا۔ اخبار کے مطابق انہوں نے جولائی میں امریکی تحقیقاتی ادارے ایف بی آئی سے بھی رابطہ کیا تھا۔ایف بی آئی نے اپنے بیان میں کہا ہے کہ ادارہ الزامات سے آگاہ ہے اور ضرورت پڑنے پر فلپائنی حکام کو معاونت فراہم کرے گا۔ ادارہ امریکی وفاقی قوانین کی خلاف ورزی سے متعلق کسی بھی ممکنہ الزام کی بھی تحقیقات کرے گا۔

تھامس مارکل 2025 میں فالج کے متعدد حملوں کے بعد فلپائن منتقل ہوئے تھے۔ اطلاعات کے مطابق وہ اب امریکی ریاست فلوریڈا کے ایک بحالی مرکز میں مقیم ہیں۔میگھن مارکل اور ان کے والد کے درمیان 2018 میں ان کی شہزادہ ہیری سے شادی سے قبل تعلقات کشیدہ ہوگئے تھے۔ تھامس مارکل شادی میں شریک نہیں ہوئے تھے، جبکہ اس موقع پر برطانیہ کے موجودہ بادشاہ چارلس سوم، جو اس وقت شہزادہ آف ویلز تھے، میگھن کو رخصتی کے لیے گلیارے تک لے کر گئے تھے۔