موٹروے ایم ون اسلام آباد تا پشاور ہر قسم کی ٹریفک کے لیے بحال

ترجمان نیشنل ہائی ویز اینڈ موٹروے پولیس کے مطابق موٹروے ایم ون اسلام آباد تا پشاور دونوں اطراف سے ہر قسم کی ٹریفک کے لیے بحال کردی گئی ہے۔

ترجمان موٹروے پولیس کے مطابق موٹروے ایم 14 ہکلہ تا کنڈل پر بحالی کا کام تاحال جاری ہے، جبکہ ایم ون سے ہزارہ موٹروے کو ملانے والے لوپ (رابطہ سڑک) پر بھی بحالی کا کام جاری ہے، اسلام آباد سے ایبٹ آباد جانے والی ٹریفک برہان انٹرچینج سے آؤٹ ہو کر جی ٹی روڈ کے ذریعے حسن ابدال سے دوبارہ ہزارہ ایکسپریس وے کو جھاری کس انٹرچینج سے جوائن کرسکتی ہے،جی ٹی روڈ این فائیو اسلام آباد تا پشاور بھی ہر قسم کی ٹریفک کے لیے بحال ہے۔

واضح رہے کہ پاکستان تحریک انصاف (پی ٹی آئی)کی جانب سے 27 ستمبر کو ہونے والا لانگ مارچ اب 4 اکتوبر کو ہوگا لیکن وفاقی دارالحکومت اسلام آباد میں سڑکوں کے کنارے کنیٹنرزتاحال موجود ہیں۔