اپنے پسندیدہ کلام اقبال کا اشتراک،تحریر: مائرہ حمزہ

مجھے یہ نظم اس لیے بہت زیادہ پسند ہے کیونکہ یہ صرف ایک پرندے کی کہانی نہیں ہے، یہ ہمارے دل کی کہانی ہے۔

اقبال نے اس نظم میں ایک چھوٹے سے، ننھے سے پرندے کو بولتا ہوا دکھایا ہے لیکن اس کی فریاد سن کر ایسا لگتا ہے جیسے وہ پرندہ ہم خود ہیں۔ جب وہ اپنے باغ کو یاد کرتا ہے، اپنی اڑان کو یاد کرتا ہے، اپنے گھونسلے کی آزادی کو یاد کرتا ہے، تو دل کو ایک عجیب سی چوٹ لگتی ہے۔

مجھے اس کی یہ بات سب سے زیادہ اچھی لگتی ہے کہ پرندہ پنجرے میں دانہ پانی ملنے کے باوجود خوش نہیں ہے۔ اسے سونے کا پنجرہ بھی اچھا نہیں لگتا کیونکہ اسے اپنی آزادی چاہیے۔ یہ ہمیں سکھاتا ہے کہ خوشی چیزوں میں نہیں ہوتی، خوشی آزادی میں ہوتی ہے، اپنے لوگوں اور اپنے وطن کے ساتھ ہونے میں ہوتی ہے۔ اس نظم کا سب سے پیارا حصہ یہ ہے کہ اقبال نے اس میں بہت نرمی سے، بہت پیار سے ہمیں سمجھایا ہے کہ کسی کو قید کرنا کتنا بڑا ظلم ہے۔ پرندہ کسی سے لڑتا نہیں، کسی کو برا نہیں کہتا، بس اپنے دل کا دکھ سناتا ہے۔ اس کی یہ معصومیت ہی دل کو چھو جاتی ہے۔

اسی لیے جب بھی میں یہ نظم پڑھتی ہوں، مجھے اپنا بچپن، اپنا گھر، اپنا باغ اور اپنی آزادی یاد آ جاتی ہے اور دل میں اللّٰہ کا شکر ادا کرنے کا جذبہ اور بھی بڑھ جاتا ہے کہ اس نے ہمیں کھلی ہوا میں سانس لینے کی نعمت دی ہے۔

نظم: پرندے کی فریاد

آتا ہے یاد مجھ کو گزرا ہوا زمانہ

وہ باغ کی بہاریں، وہ سب کا چہچہانا

آزادیاں کہاں وہ اب اپنے گھونسلے کی

اپنی خوشی سے آنا، اپنی خوشی سے جانا

لگتی ہے چوٹ دل پر، آتا ہے یاد جس دم

شبنم کے آنسوؤں پر کلیوں کا مسکرانا

وہ پیاری پیاری صورت، وہ کامنی سی مورت

آباد جس کے دم سے تھا میرا آشیانہ

آتی نہیں صدائیں اس کی مرے قفس میں

ہوتی مری رہائی، اے کاش میرے بس میں

کیا بد نصیب ہوں میں، گھر کو ترس رہا ہوں

ساتھی تو ہیں وطن میں، میں قید میں پڑا ہوں

آئی بہار، کلیاں پھولوں کی ہنس رہی ہیں

میں اس اندھیرے گھر میں قسمت کو رو رہا ہوں

اس قید کا الٰہی، دکھڑا کسے سناؤں

ڈر ہے یہیں قفس میں میں غم سے مر نہ جاؤں

جب سے چمن چھٹا ہے، یہ حال ہو گیا ہے

دل غم کو کھا رہا ہے، غم دل کو کھا رہا ہے

گانا اسے سمجھ کر خوش ہوں نہ سننے والے

دیکھیں مرے تڑپنے کو، وہ بھی ہیں خوش، یہ بھی ہیں خوش

حوالہ: علامہ محمد اقبال، بانگِ درا (1924ء)

آخر میں بس یہی کہنا چاہوں گی کہ یہ نظم ہمیں زندگی کا سب سے بڑا سبق دیتی ہے۔ یہ نظم ہمیں بتاتی ہے کہ انسان ہو یا پرندہ، سب کو اللّٰہ نے آزاد پیدا کیا ہے۔ پنجرہ چاہے کتنا ہی خوبصورت ہو، چاہے اس میں سب کچھ ملتا ہو لیکن وہ کبھی باغ کی ایک صبح کا مقابلہ نہیں کر سکتا۔ باغ میں جو خوشی، سکون اور جو اپنوں کی محبت ہے، وہ قید میں کہاں؟

یہ نظم ہمیں یہ بھی سکھاتی ہے کہ ہمیں کبھی کسی کی آزادی نہیں چھیننی چاہیے۔ نہ کسی پرندے کی اور نہ ہی کسی انسان کی؛ کیونکہ جس طرح پرندہ قید میں تڑپتا ہے، اسی طرح ہر دل قید میں تڑپتا ہے۔ سب سے بڑی بات یہ کہ یہ نظم ہمیں شکر گزار بناتی ہے۔ جب ہم کھلی ہوا میں سانس لیتے ہیں، جب ہم اپنی مرضی سے اپنے گھر آتے جاتے ہیں، جب ہم اپنے پیاروں کے ساتھ ہنستے کھیلتے ہیں، تو ہمیں یاد رکھنا چاہیے کہ یہ سب اللّٰہ کی بہت بڑی نعمت ہے۔

اسی لیے اقبال کا یہ پرندہ آج بھی ہمارے دلوں میں زندہ ہے اور اس کی فریاد آج بھی ہمیں یہ کہہ رہی ہے کہ آزادی کی قدر کرو، کیونکہ آزادی ہی اصل زندگی ہے۔