پیر، 16 نومبر، 2026
Baaghi TV Logo
ٹرینڈنگ

لال جوڑا،تحریر: نیہا علی

نقطہ نظر
Kitchen and Me, written by: Neha Ali

لال جوڑا محض چند گز کپڑے، کڑھائی اور رنگوں کا امتزاج نہیں ہوتا، بلکہ ہمارے معاشرے میں یہ ایک لڑکی کے خوابوں، امیدوں، خواہشوں اور زندگی کے ایک نئے مرحلے کی علامت سمجھا جاتا ہے۔ اس جوڑے سے وابستہ تصورات میں خوشی بھی ہے، انتظار بھی اور کئی ان کہی کہانیاں بھی۔ہمارے معاشرے میں جب کسی گھر میں بیٹی کی شادی طے ہوتی ہے تو گھر کے ماحول میں ایک الگ ہی رونق پیدا ہو جاتی ہے۔ ماں اپنی بیٹی کے لیے کپڑوں کا انتخاب کرتی ہے، باپ اپنی استطاعت کے مطابق انتظامات میں مصروف ہو جاتا ہے اور بہن بھائی اس نئے سفر کی خوشیوں میں شریک ہوتے ہیں۔ ان تمام تیاریوں کے درمیان لال جوڑے کی خریداری ایک خاص اہمیت رکھتی ہے۔ لڑکی کی نگاہیں اس لباس میں اپنا آنے والا کل تلاش کرتی ہیں، مگر شاید بہت کم لوگ اس لباس کے پیچھے چھپے جذبات کو سمجھ پاتے ہیں۔

لال جوڑا پہننے والی لڑکی صرف ایک گھر سے دوسرے گھر نہیں جاتی، بلکہ اپنی زندگی کے ایک مانوس حصے سے رخصت ہو کر ایک نئے ماحول میں قدم رکھتی ہے۔ اس کے ذہن میں کئی سوالات ہوتے ہیں۔ کیا نئے گھر میں اسے وہی محبت ملے گی؟ کیا اس کی بات کو اہمیت دی جائے گی؟ کیا اس کی پسند، ناپسند اور احساسات کا احترام کیا جائے گا؟ ان سوالات کا جواب کسی لباس کی چمک میں نہیں، بلکہ ان رشتوں کے رویّوں میں پوشیدہ ہوتا ہے جن سے اس کی آئندہ زندگی وابستہ ہوتی ہے۔افسوس کہ ہمارے ہاں شادی کی تقریبات میں ظاہری شان و شوکت کو ضرورت سے زیادہ اہمیت دی جانے لگی ہے۔ لال جوڑے کی قیمت، اس کی تزئین، زیورات کی نمائش اور تقریب کے اخراجات کو عزت و وقار کا پیمانہ بنا دیا گیا ہے۔ بعض گھرانے اپنی مالی حیثیت سے بڑھ کر محض معاشرتی دباؤ کے تحت اخراجات کرتے ہیں۔ سوال یہ ہے کہ کیا خوشیوں کی بنیاد مہنگے لباس اور قیمتی زیورات پر رکھی جا سکتی ہے؟ کیا ایک عام سا لباس پہننے والی لڑکی کی خوشی کسی بیش قیمت لباس والی لڑکی سے کم ہوتی ہے؟ ہرگز نہیں!

اصل خوب صورتی لباس کی قیمت میں نہیں، بلکہ اس محبت میں ہے جو اسے پہننے والی لڑکی کے گرد موجود ہوتی ہے۔ ایک باپ کی دعائیں، ماں کی شفقت، بہن بھائیوں کی محبت اور خاندان کا خلوص کسی بھی قیمتی لباس سے بڑھ کر ہیں۔

یہ بھی حقیقت ہے کہ ہر لال جوڑے کے پیچھے ایک جیسی کہانی نہیں ہوتی۔ کسی کے لیے یہ خوشیوں کا پیغام ہوتا ہے، کسی کے لیے برسوں کی دعاؤں کی قبولیت، اور کسی کے لیے ایک ایسی تبدیلی جسے قبول کرنے میں وقت لگتا ہے۔ اس لیے ضروری ہے کہ ہم شادی کو محض ایک رسم یا نمائش نہ بنائیں، بلکہ اسے دو انسانوں کے درمیان عزت، اعتماد، برداشت اور ذمہ داری کے رشتے کی ابتدا سمجھیں۔

ہمیں اپنی بیٹیوں کو صرف رخصتی کے لیے تیار نہیں کرنا چاہیے، بلکہ انہیں خود اعتمادی، شعور اور اپنے حقوق کی پہچان بھی دینی چاہیے۔ اسی طرح بیٹوں کی تربیت بھی اس انداز سے ہونی چاہیے کہ وہ شریکِ حیات کو محض ایک ذمہ داری نہیں بلکہ برابر کا انسان سمجھیں۔

لال جوڑا تبھی حقیقتاً خوب صورت معلوم ہوتا ہے جب اسے پہننے والی لڑکی کی زندگی بھی محبت، تحفہ اور احترام کے رنگوں سے آراستہ ہو۔ ورنہ ریشم، زری اور قیمتی کڑھائی سے سجا لباس بھی ان محرومیوں کا ازالہ نہیں کر سکتا جو کسی انسان کو اپنے ہی رشتوں میں محسوس ہوں۔

یاد رکھیے! لال جوڑے کی سرخی چند روزہ تقریب کی رونق ہے، مگر ازدواجی زندگی کی اصل خوب صورتی عمر بھر قائم رہنے والے احترام، خلوص اور محبت میں ہے۔