اتوار، 22 نومبر، 2026
Baaghi TV Logo
ٹرینڈنگ

کوئٹہ پریس کلب، 100 سے زائد علماء کا مولانافضل الرحمان کی سیاست سے لاتعلقی کا اعلان

مصنف:

بلوچستان کے 100 سے زائد علماء کرام، مہتممینِ مدارس اور مذہبی رہنماؤں نے کوئٹہ پریس کلب میں مشترکہ پریس کانفرنس میں دو ٹوک اعلان کیا ہے کہ دینی مدارس کسی سیاسی جماعت کی جاگیر نہیں ہیں، اور انہیں کسی جماعت کے سیاسی مقاصد کے لیے استعمال نہیں ہونے دیا جائے گا۔


علماء کا واضح مؤقف ہے کہ مدارس کا قیام قرآن و سنت کی تعلیم، دینی علوم کی ترویج اور اسلامی اقدار کے تحفظ کے لیے ہوا تھا — نہ کہ سیاسی جلسوں میں بھیڑ اکٹھی کرنے، احتجاجی مظاہروں میں افرادی قوت فراہم کرنے، یا کسی جماعت کے مفادات کے لیے۔مدارس پوری امت کا علمی و روحانی سرمایہ ہیں۔ ان کی شناخت کسی ایک سیاسی جماعت کی تابع نہیں ہو سکتی۔


علماء کرام کا کہنا تھا کہ مولانا فضل الرحمٰن صاحب، مدارس کی نمائندگی کا اختیار کسی ایک سیاسی جماعت کے پاس نہیں۔ دینی اداروں کی اپنی مستقل شناخت اور انتظامی خودمختاری ہے۔ مدارس کے نام پر سیاست کا سلسلہ اب ختم ہونا چاہیے۔ مدارس کا بنیادی فریضہ علم و تربیت ہے، نہ کہ سیاسی طاقت کا مظاہرہ۔ طلبہ کسی سیاسی جماعت کے کارکن نہیں ہیں! وہ حصولِ علم کے لیے مدارس میں آتے ہیں، کسی رہنما کے اقتدار، احتجاج یا مذاکرات کا حصہ بننے کے لیے نہیں۔ دینی اداروں پر اجارہ داری کا تصور خود مدارس کی خودمختاری کے منافی ہے۔ کوئی جماعت محض مذہبی تشخص کی بنیاد پر تمام مدارس کی نمائندگی کا دعویٰ نہیں کر سکتی۔ اختلافِ رائے کو سیاسی مخالفت کہہ کر رد نہیں کیا جا سکتا۔ اگر سو سے زائد علماء اپنی شناخت کو جماعتی سیاست سے الگ رکھنے کا اعلان کرتے ہیں، تو ان کی آواز پر سنجیدہ غور ہونا چاہیے۔ مدارس کو سیاسی دباؤ کا ذریعہ بنانے کے بجائے ان کے اصل مسائل حل کیے جائیں — مالی وسائل، معیاری تعلیم، اساتذہ کی تربیت، انتظامی خودمختاری اور طلبہ کا مستقبل۔ دین کی خدمت اور جماعتی سیاست دو الگ میدان ہیں۔ مذہبی وابستگی کسی سیاسی جماعت کی غیر مشروط حمایت کا تقاضا نہیں کرتی۔


یہ محض چند افراد کا اختلاف نہیں، یہ 100 سے زائد علماء کا مشترکہ مؤقف ہے — مدارس کی خودمختاری کا اعلان ہے۔مدارس کو علم کے مراکز رہنے دیجیے، سیاسی طاقت کا مظاہرہ گاہ مت بنائیے!