برطانیہ کا سعودی دفاعی نظام مضبوط بنانے کے لیے ٹائیفون طیارے تعینات کرنے کا اعلان

برطانوی وزارت دفاع نے اعلان کیا ہے کہ وہ حوثی حملوں میں اضافے کے تناظر میں سعودی عرب کے فضائی دفاع کو مضبوط بنانے میں تعاون کرے گی، جس کے لیے رائل ایئر فورس کے جنگی طیارے دفاعی مشن پر تعینات کیے جائیں گے۔

خبر رساں ادارے بلومبرگ کے مطابق، برطانوی حکام نے بتایا ہے کہ ٹائیفون طیارے سعودی عرب کے شہروں، اہم تنصیبات اور بنیادی ڈھانچے کو ایران سے وابستہ حوثیوں کے فضائی حملوں سے بچانے میں حصہ لیں گے، تاہم یہ طیارے حوثیوں کے خلاف کوئی جارحانہ کارروائی نہیں کریں گے۔

حکام نے مزید بتایا کہ برطانیہ ایک فوجی مال بردار طیارہ 'اٹلس اے 400 ایم' اور فوجی مشیر بھی فراہم کرے گا تاکہ سعودی دفاعی صلاحیتوں کو مزید مضبوط بنانے کی کوششوں میں مدد دی جا سکے۔