ایلون مسک نے چار بچوں کی ماں سے اچانک رشتہ ختم کردیا

ارب پتی ٹیکنالوجی کاروباری شخصیت ایلون مسک نے اپنے چار بچوں کی والدہ شیوون زیلس سے مبینہ طور پر بغیر کسی پیشگی اطلاع کے رشتہ ختم کردیا۔

غیر ملکی میڈیا کے مطابق نیورالنک کی ایگزیکٹو شیوون زیلس نے جمعہ کو ایکس پر جاری بیان میں اپنے اور ایلون مسک کے درمیان حالیہ علیحدگی کی تصدیق کی۔ 40 سالہ زیلس نے کہا کہ ایک ہفتے کے اندر محبت سے رشتہ ختم ہونے تک کا سفر ان کے لیے مشکل تھا اور انہیں اس حوالے سے کوئی پیشگی انتباہ نہیں ملا۔زیلس نے اپنے بیان میں کہا کہ وہ مسک کو گہری محبت، سکون اور تحفظ کا احساس دینے پر شکر گزار ہیں۔ ان کے مطابق وہ اور ان کے بچے مسک کے لیے ایک محفوظ ماحول تھے، جہاں اسے خوشی اور محبت ملتی تھی۔

شیوون زیلس اور ایلون مسک کے چار بچے ہیں، جن میں نومبر 2021 میں پیدا ہونے والے جڑواں بچے اسٹرائیڈر اور ایزور، 2024 میں پیدا ہونے والی بیٹی آرکیڈیا اور فروری 2025 میں پیدا ہونے والا بیٹا سیلڈن لائکرگس شامل ہیں۔

زیلس نے کہا کہ وہ اپنے بچوں کے لیے بے حد شکر گزار ہیں اور امید کرتی ہیں کہ وہ اور مسک مستقبل میں اچھے دوست اور شریک والدین کے طور پر تعلق برقرار رکھ سکیں گے۔ انہوں نے کہا کہ وہ تکلیف میں ہیں تاہم مسک کی خوشی کی خواہش ہمیشہ رکھیں گی۔شیوون زیلس نے اپنے بیان کے ساتھ ایلون مسک کے ساتھ ایک ہفتہ قبل ہونے والی ٹیکسٹ گفتگو کا اسکرین شاٹ بھی شیئر کیا۔ گفتگو میں زیلس نے مسک کو لکھا تھا کہ ناشتے پر ملاقات بہت اچھی رہی اور وہ ان سے بہت محبت کرتی ہیں، جس کے جواب میں مسک نے بھی لکھا، ’’میں بھی تم سے محبت کرتا ہوں۔‘‘

میڈیا رپورٹ کے مطابق یہ پیغامات 24 ستمبر کو امریکی صدر ڈونلڈ ٹرمپ اور چینی صدر شی جن پنگ کے ساتھ مسک کی ایک عشائیے میں شرکت سے تقریباً ایک ہفتے پہلے کے ہیں۔زیلس نے اپنے بیان کے اختتام پر مسک کے لیے نیک خواہشات کا اظہار کرتے ہوئے کہا کہ دنیا خوش قسمت ہے کہ اس کے پاس ایلون مسک جیسا شخص موجود ہے۔