دہلی فسادات، 19 مساجد کو انتہا پسندوں نے پہنچایا نقصان،مسلمان کریں گے سب کی مرمت

دہلی فسادات، 19 مساجد کو انتہا پسندوں نے پہنچایا نقصان،مسلمان کریں گے سب کی مرمت
باغی ٹی وی کی رپورٹ کے مطابق دہلی فسادات میں جہاں مسلمانوں کی املاک، گھروں، دکانوں کو جلایا گیا وہیں چار مساجد کو بھی شہید کیا گیا، تا ہم اب اطلاع ملی ہے کہ دہلی فسادات میں ہندو انتہا پسندوں نے دیگر 19 مساجد کو بھی نقصان پہنچایا ہے

صدرنشین دہلی وقف بورڈ اور عام آدمی پارٹی کے رکن اسمبلی امانت اللہ خان نے انکشاف کیا کہ ہندو انتہا پسندوں کی جانب سے مسلم کش فسادات کے دوران دیگر 19 مساجد کو بھی نقصان پہنچا ہے، ہم تمام مسجد کی مرمت کریں گے، اس کے لئے فنڈ قائم کر دیا گیا ہے، مساجد کو شہید کر دیا گیا پھر بھی ہم نے نماز جمعہ اور دیگر نمازیں انہی مساجد میں ادا کر رہے ہیں، ہمیں نماز پڑھنے سے کوئی نہیں روک سکتا.

امانت اللہ خان کا مزید کہنا تھا کہ شہید ہونے والے مساجد کے لئے ابتدائی طور پر 5 لاکھ کا فنڈ رکھا گیا ہے بعد میں اس میں مزید اضافہ بھی ہو گا، ہم تمام مساجد کا مکمل کام کروائیں گے،انہوں نے کہا کہ وقف بورڈ مصطفی آباد میں ریلیف کیمپ بھی چلارہا ہے جس میں ایک ہزار افراد کے لئے گنجائش ہے جہاں تشدد کے متاثرین پناہ لے سکتے ہیں۔

دہلی فسادات کو ایک ہفتہ ہو چکا، ابھی تک وہاں کے مسلمانوں میں خوف کم نہیں ہو سکا،کئی خاندان علاقہ چھوڑ گئے تھے اب واپس آنے کے لئے راضی نہیں ہو رہے، کیجریوال سرکار مسلمانوں کو سیکورٹی بھی نہیں دے رہی،کئی مسلمان خاندان پناہ گزینوں کے کیمپ میں مقیم ہو گئے ہیں.اس کیمپ میں 15 سو کے قریب افراد موجود ہیں جنہوں نے فسادات کے وقت گھر چھوڑا تھا.

دہلی میں ہندو انتہا پسندوں کی جانب سے متنازعہ شہریت بل کے خلاف احتجاج کرنے والے مظاہرین پر تشدد کیا گیا، مسلمانوں کے گھر جلائے گئے، مساجد کی بے حرمتی کی گئی اور چار مساجد کو شہید کیا گیا.بھجن پورہ میں مزار کو نذر آتش کیا گیا، اشوک نگر میں مسجد کو آگ لگائی گئی اور مینار پر ہنومان کا جھنڈا بھی لہرا دیا گیا۔