سیالکوٹ (باغی ٹی وی ،ڈسٹرکٹ رپورٹرمدثررتو) وفاقی تحقیقاتی ادارے (ایف آئی اے) نے سیالکوٹ ائیرپورٹ پر بڑی کارروائی کرتے ہوئے قطر جانے والے 6 مشتبہ مسافروں کو گرفتار کرلیا۔ ایف آئی اے گوجرانوالہ سرکل کے مطابق گرفتار افراد کا تعلق گوجرانوالہ اور سیالکوٹ سے ہے، جن کے پاسپورٹ پر قطر کے ورک پرمٹ ویزے درج تھے۔ تفتیشی ذرائع کے مطابق یہ افراد قطر کے راستے لیبیا اور پھر سمندری راستے سے اٹلی جانے کی کوشش میں تھے۔
ایف آئی اے حکام کا کہنا ہے کہ قطر کے ذریعے یورپ اسمگلنگ کا یہ ایک نیا روٹ سامنے آیا ہے۔ گرفتار افراد نے مبینہ طور پر ایجنٹوں کو فی کس 32 لاکھ روپے ادا کیے تھے۔
ادھر جنوبی پنجاب میں بھی ایف آئی اے ملتان نے کارروائیاں کرتے ہوئے انسانی اسمگلنگ اور ویزا فراڈ میں ملوث 7 ملزمان کو گرفتار کرلیا۔ ادارے کے مطابق ملزمان نے سادہ لوح شہریوں کو بیرونِ ملک روزگار کا جھانسہ دے کر لاکھوں روپے ہتھیائے اور بعد میں نہ ویزے فراہم کیے اور نہ ہی رقم واپس کی۔
ایف آئی اے کے مطابق تمام گرفتار افراد کے خلاف مقدمات درج کر کے مزید تفتیش شروع کر دی گئی ہے۔
