احسان صادق کی تعیناتی انتہائی احسن فیصلہ،تجزیہ: شہزاد قریشی

سابق آئی جی پولیس سائوتھ پنجاب احسان صادق کو اینٹی منی لانڈرنگ واینٹی ٹیررفنانسگ اتھارٹی کے پہلے ڈائریکٹر جنرل کے بطور تعیناتی کا فیصلہ انتہائی احسن اور قابل ستائش ہے ۔ جس سے ثابت ہوتاہے کہ پاکستان کے معاشی و مالی معاملات اور دہشت گردی کی سرگرمیوں کو کنٹرول کرنے کے لئے حکومت سنجیدہ اقدامات کا ارادہ رکھتی ہے اوریہ استحکام پاکستان کی جانب ایک اہم قدم ہے۔ احسان صادق پاکستا ن پولیس سروس کا ایک مایہ ناز ستارہ ہیں۔ حب الوطنی ، دیانتداری فرض شناسی پیشہ وارانہ مہارت ،تقویٰ ، پرہیز گاری اور بلند حوصلے کا پیکر ہیں۔ ایف آئی اے میں بطور ایڈیشنل ڈائریکٹر جنرل فنانشیل کرائم فرائض سرانجام دیتے ہوئے ڈاکٹر احسان صادق نے وطن عزیز کو ایف اے ٹی ایف کی گرے لسٹ سے نکلوانے کے لئے جس جانفشانی اور مخصوص جذبے سے سرشار ہو کر کام کیا اس کا اعتراف اس وقت کے وزیر خارجہ نے بھی کھلے دل کے ساتھ سراہا ۔ بطور ایڈیشنل آئی جی پولیس سائوتھ پنجاب منظم کرائم میں ملوث گروہوں کے خلاف آپریشن کا آغاز کیا ۔

استحکام پاکستان ایک فوجی آپریشن کا نام نہیں جیسا اس کو سوشل میڈیا اور سیاسی حلقوں میں پیش کیا جا رہا ہے ۔ استحکام پاکستان” رائٹ مین فار رائٹ جاب کا نام بھی ہے” استحکام پاکستان میں اعلی کردار قومی جذبے ایماندار نیک نیتی اورپ یشہ وارانہ مہارت کے حامل افسران و اہلکاروں کا اہم عہدوں پر تعیناتی حکومت اور مقتدرہ کی جانب سے ان آفیسران کی بہتر کارکردگی میں معاونت کا نام ہے ۔ بلاشبہ احسان صادق کا انتہائی حساس مشن کی تکمیل کے لئے انتخاب حکومت اور مقتدرہ کااحسن اقدام ہے ۔ یقینا ایسے اقدامات کے ثمرات قوم کو جلد ملیں گی۔ ملک کے تمام صوبوں میں بیورو کریٹ ،سول انتظامیہ ، اعلٰی پولیس افسران موجود ہیں جن کا ماضی حال داغدار نہیں، بدقسمتی سے جن کو فیلڈ میں رہ کر ملک وقوم کی خدمت کا فریضہ سرانجام دینا چاہیئے وہ ” کھڈے لائن ”لگے ہیں جو قانون کی حکمرانی دیانتداری میں اپنی مثال آپ ہیں مگر افسوس سیاسی پشت پناہی اور دیگر عوامل ان شخصیات کا راستہ روکا ہوا ہے۔ راولپنڈی ایک حساس ترین شہر ہے اس شہر سے لے کر پنجاب میں پولیس کے اعلیٰ افسران ، سول انتظامیہ کے اعلیٰ افسران کا ماضی اور حال دیکھیں تو کیا یہ استحکام پاکستان کے لئے سوالیہ نشان نہیں ؟عقاب کی نظر رکھنے والے اعلیٰ پولیس افسران کی موجودگی میں لینڈ مافیا کے ڈیروں کو آباد کرنے والوں نے پولیس کے محکمہ کو بدنام کرکے رکھ دیاہے۔استحکام پاکستان کی کامیابی کے لئے ضروری ہے کہ ذمہ دار بن کرریاست پنجاب اور دیگر صوبوں میں تعینات اعلیٰ پولیس افسران اور سول بیورو کریسی کے افسران کی لسٹ منگوا کر غور و فکر کریں ایسے افسران کو تعینات کریں جو استحکام پاکستان میں اپنا کردار اعلیٰ کارکردگی کے حامل افراد کو تعینات کیا جائے۔