فٹبال کی عالمی تنظیم فیفا نے پاکستان فٹبال فیڈریشن (پی ایف ایف) کی معطلی کو ختم کرنے کا فیصلہ کر لیا ہے۔ ذرائع کے مطابق، فیفا نے پی ایف ایف کو اس فیصلے سے آگاہ کر دیا ہے، جس کے بعد پاکستان فٹبال فیڈریشن کی معطلی ختم ہو گئی ہے۔
ذرائع کا کہنا ہے کہ فیفا نے پاکستان فٹبال فیڈریشن کی جانب سے آئینی ترامیم کی منظوری کے بعد معطلی کو ختم کیا۔ پی ایف ایف کی نارملائزیشن کمیٹی کے رکن شاہد کھوکھر نے معطلی ختم ہونے کی تصدیق کی۔ انہوں نے کہا کہ پی ایف ایف کی کانگریس کے اجلاس میں آئینی ترامیم کی منظوری کے بعد معطلی ختم ہوئی ہے اور پاکستان فٹبال فیڈریشن کی مسلسل حمایت پر فیفا اور ایشین فٹبال کنفیڈریشن (اے ایف سی) کا شکریہ ادا کرتے ہیں۔
یاد رہے کہ گزشتہ ماہ فیفا نے پی ایف ایف کی معطلی اس وقت عائد کی تھی جب پی ایف ایف کی کانگریس نے انتخابی اصلاحات کے لیے آئینی ترامیم کو منظور نہیں کیا تھا۔ فیفا نے اس وقت کہا تھا کہ معطلی اس وقت تک برقرار رہے گی جب تک پی ایف ایف کانگریس فیفا اور اے ایف سی کی جانب سے پیش کردہ آئینی ترامیم کی منظوری نہیں دے دیتی۔اس سے قبل، فیفا اور اے ایف سی نے پی ایف ایف کو اپنے آئین میں ترامیم کرنے کی سفارش کی تھی، خاص طور پر انتخابی عمل سے متعلق شقوں میں تبدیلی کی تجویز دی تھی۔ تاہم، پی ایف ایف کی منتخب کانگریس نے ان ترامیم کو مسترد کر دیا تھا، جس کے نتیجے میں معطلی کا فیصلہ کیا گیا۔
تاہم، گزشتہ جمعرات کو ہونے والے غیر معمولی اجلاس میں پاکستان فٹبال فیڈریشن کی نو منتخب کانگریس نے فیفا کی مجوزہ آئینی ترامیم کو بھاری اکثریت سے تسلیم کر لیا، جس کے بعد معطلی ختم ہونے کا فیصلہ کیا گیا۔
