کرم اور پارا چنار میں کھانے پینے کی اشیاء کی قلت ختم ہونے کا نام نہیں لے رہی، جس کے باعث مقامی شہری شدید مشکلات کا شکار ہیں۔
انتظامیہ کی جانب سے خوراک کی فراہمی کا سلسلہ جاری ہے، اور اب تک 313 ٹرک کھانے پینے کی اشیاء لے کر کرم پہنچ چکے ہیں۔ تاہم، یہ مقدار خوراک کی کمی کو پوری کرنے کے لیے ناکافی ثابت ہوئی ہے، اور عوام کی ضروریات کو پورا نہیں کر سکی۔اس دوران ٹل سے کھانے پینے کی اشیاء لے کر 120 گاڑیوں پر مشتمل ایک قافلہ کرم پہنچا ہے، لیکن اس کے باوجود قیمتوں میں مسلسل اضافہ دیکھنے کو مل رہا ہے۔ ضلع کرم میں کھانے پینے کی اشیاء کی قیمتیں آسمان کو چھو رہی ہیں، جس کی وجہ سے لوگوں کی روزمرہ زندگی میں مشکلات مزید بڑھ گئی ہیں۔ مقامی لوگوں نے مطالبہ کیا ہے کہ کم از کم 500 اضافی ٹرک بھجوائے جائیں تاکہ خوراک کی کمی پوری کی جا سکے۔
دوسری جانب لوئر کرم میں بنکرز گرانے کا عمل بھی ایک بار پھر شروع کردیا گیا ہے۔ ضلعی انتظامیہ کے مطابق امن معاہدے کی تمام شرائط پر عمل درآمد کے لیے مختلف اقدامات کیے جا رہے ہیں۔ اب تک فریقین کے 10 بنکرز کو گرا دیا گیا ہے تاکہ علاقے میں امن قائم کیا جا سکے۔علاقہ مکینوں کا کہنا ہے کہ امن کی فضا قائم کرنے کے لیے مزید اقدامات کی ضرورت ہے تاکہ لوگوں کی زندگیوں میں استحکام آ سکے اور خوراک کی فراہمی کے حوالے سے حالات بہتر ہوں۔
گھوٹکی: پولیس کا کریک ڈاؤن، فائرنگ کا تبادلہ، ملزمان فرار، چوری شدہ دو ٹریکٹر برآمد
