گرفتار ایجنٹس رہا نہ کیے گئے تو پاک افغان شاہراہ بند کریں گے، کسٹم کلیئرنس ایسوسی ایشن

لنڈی کوتل(باغی ٹی وی رپورٹ) آل طورخم کسٹم کلیئرنگ ایجنٹس ایسوسی ایشن کے رہنماؤں نے پریس کانفرنس کرتے ہوئے گرفتار ایجنٹس کی فوری رہائی کا مطالبہ کیا اور انتباہ دیا کہ اگر 24 گھنٹوں میں رہا نہ کیا گیا تو پاک افغان شاہراہ بند کر کے غیر معینہ مدت تک احتجاج کیا جائے گا۔

چیئرمین معراج الدین شینواری، صدر مجیب شینواری اور دیگر رہنماؤں نے کہا کہ سیکیورٹی اہلکاروں نے 40 روز قبل ایجنٹس کو ڈالر ڈیکلریشن کے معاملے پر حراست میں لیا، جو غیر قانونی اور ناقابل قبول ہے۔ انہوں نے کہا کہ کسٹم ایجنٹس کو قانونی تقاضے پورے کرتے ہوئے ایف آئی اے یا کسٹم حکام کے حوالے کیا جانا چاہیے تھا، مگر انہیں غیر قانونی طور پر حراست میں رکھا گیا ہے۔

رہنماؤں نے طورخم بارڈر پر کاروباری سرگرمیوں کے تحفظ کا مطالبہ کرتے ہوئے کہا کہ روزگار کے مواقع کم ہونے کی وجہ سے مقامی افراد دیگر علاقوں میں منتقل ہونے پر مجبور ہیں۔

ان کا کہنا تھا کہ سیکیورٹی حکام سے مذاکرات اور جرگے بے سود رہے، اب اگر ایجنٹس کو فوری رہا نہ کیا گیا تو سخت احتجاج کیا جائے گا، جس میں شاہراہ کی بندش اور قلم چھوڑ ہڑتال بھی شامل ہوگی۔