ننکانہ صاحب (باغی ٹی وی نامہ نگار احسان اللہ ایاز) ڈپٹی کمشنر ننکانہ صاحب محمد تسلیم اختر راؤ نے ڈسٹرکٹ ہیڈ کوارٹر ہسپتال کا اچانک دورہ کیا اور او پی ڈی سمیت ہسپتال کے مختلف شعبہ جات کا تفصیلی معائنہ کیا۔
ڈپٹی کمشنر نے او پی ڈی میں پرچی کاؤنٹرز بند ہونے پر ہسپتال انتظامیہ کی سخت سرزنش کی اور اپنی موجودگی میں فوری طور پر پرچی کاؤنٹرز کو بحال کروایا۔ اس موقع پر ڈپٹی کمشنر محمد تسلیم اختر نے کہا کہ او پی ڈی میں کنسلٹنٹ ڈاکٹرز مریضوں کو علاج معالجے کی سہولیات فراہم کر رہے ہیں۔ انہوں نے پیڈز وارڈز اور زچہ بچہ سنٹرز پر علاج معالجے کی جاری فراہمی کا بھی جائزہ لیا اور اطمینان کا اظہار کیا۔ انہوں نے ایمرجنسی وارڈز میں موجود ڈاکٹرز کی جانب سے مریضوں کو علاج معالجے کی مکمل سہولیات کی فراہمی کو بھی سراہا۔
ڈپٹی کمشنر نے ہڑتالی ڈاکٹروں کو مخاطب کرتے ہوئے کہا کہ انہیں مریضوں کا خیال رکھنا چاہیے کیونکہ یہ لوگوں کی صحت کا اہم معاملہ ہے۔ بعد ازاں، ڈپٹی کمشنر نے مریم نواز ہیلتھ کلینک کھیاڑے کلاں کا بھی دورہ کیا اور وہاں فراہم کی جانے والی طبی سہولیات کا جائزہ لیا۔ اس موقع پر اسسٹنٹ کمشنر عطیہ عنائیت سمیت دیگر ضلعی افسران بھی ان کے ہمراہ موجود تھے۔
