اسلام آباد: وزیرِاعظم محمد شہباز شریف نے پاکستان ریٹیل بزنس کونسل کے چیئرمین زیاد بشیر کی قیادت میں ریٹیلرز کے وفد سے ملاقات کی۔ اس ملاقات میں وزیرِاعظم نے ریٹیلرز کے مسائل کے حل کی یقین دہانی کرائی اور اس حوالے سے عملی اقدامات کرنے کا عزم ظاہر کیا۔
وزیرِاعظم شہباز شریف نے کہا کہ حکومت ملک کی معیشت کو مضبوط بنانے اور ریٹیل سیکٹر کے مسائل کو حل کرنے کیلئے سنجیدہ اقدامات کر رہی ہے۔ انہوں نے مزید کہا کہ ایسے ریٹیلرز جو پہلے سے ٹیکس نیٹ میں ہیں، ان پر ٹیکس کا مزید بوجھ نہیں ڈالا جائے گا۔ تاہم، ایسے ریٹیلرز جو ٹیکس ادا نہیں کرتے، انہیں ٹیکس نیٹ میں لانے کیلئے ترجیحی بنیادوں پر اقدامات کیے جا رہے ہیں۔وزیرِاعظم نے اس بات پر بھی زور دیا کہ استعمال شدہ اشیاء کی اسمگلنگ روکنے کیلئے اقدامات تیز کیے جائیں گے تاکہ ملکی معیشت کو مستحکم کیا جا سکے۔ انہوں نے کہا کہ مقامی صنعت کو جدید ٹیکنالوجی اپنانا چاہئے تاکہ وہ بین الاقوامی مارکیٹ میں مقابلہ کر سکیں اور اپنی برآمدات بڑھا سکیں۔مزید براں، وزیرِاعظم نے ایف بی آر کی دیگر اصلاحات کے ساتھ ساتھ معیشت کو کیش لیس بنانے کیلئے بھی اقدامات کرنے کی ضرورت پر زور دیا۔
اجلاس میں شریک شرکاء نے وزیرِاعظم کے اقدامات کو خوش آئند قرار دیا اور کہا کہ مہنگائی اور شرح سود میں کمی کی بدولت مصنوعات کی کھپت میں اضافہ ہو رہا ہے، جس سے پیدوار میں بھی اضافہ ہو رہا ہے۔ شرکاء نے اس امید کا اظہار کیا کہ ان اقدامات سے مہنگائی میں مزید کمی آئے گی اور ملک میں روزگار کے نئے مواقع پیدا ہوں گے۔
وفد کے شرکاء نے حکومت کی جانب سے کی جانے والی اصلاحات کو خوش آئند قرار دیتے ہوئے کہا کہ ان کے دور رس مثبت اثرات معیشت پر مرتب ہوں گے۔ ریٹیلرز کے ٹیکس نیٹ میں شامل ہونے سے ملک کے محصولات میں اضافہ ہوگا، اور جو ریٹیلرز پہلے سے ٹیکس نیٹ میں ہیں، ان کے مسائل کے حل کیلئے حکومت کے اقدامات کو بھی سراہا گیا۔
اجلاس میں چیئرمین پاکستان ریٹیل بزنس کونسل زیاد بشیر، سی ای او سروس سیلز کارپوریشن شاہد حسین، سی ای او بیچ ٹری شہریار بخش، وفاقی وزراء احسن اقبال، جام کمال خان، احد خان چیمہ، محمد اورنگزیب، رانا تنویر حسین، وزیرِ مملکت علی پرویز ملک اور دیگر متعلقہ اعلی حکام نے بھی شرکت کی۔
