سپریم کورٹ میں تعینات ہونے والے 6 نئے ججز نے عہدے کا حلف اٹھا لیا۔ چیف جسٹس پاکستان، یحییٰ آفریدی نے ان نئے ججز سے عہدے کا حلف لیا۔ ان ججز میں جسٹس عامر فاروق، جسٹس ہاشم کاکڑ، جسٹس اشتیاق ابراہیم، جسٹس شکیل احمد، جسٹس شفیع صدیقی، اور جسٹس صلاح الدین پنہور شامل ہیں۔
اس کے علاوہ، جسٹس میاں گل حسن اورنگزیب نے بھی ایکٹنگ جج کے طور پر سپریم کورٹ میں حلف اٹھایا۔ چیف جسٹس پاکستان، یحییٰ آفریدی نے ان سے بھی حلف لیا۔تقریب حلف برداری میں اسلام آباد ہائیکورٹ کے جج محسن اختر کیانی، اٹارنی جنرل، وکلا، لاء افسران اور عدالتی اسٹاف نے شرکت کی۔
یاد رہے کہ چند روز قبل چیف جسٹس پاکستان یحییٰ آفریدی کی زیر صدارت ہونے والے جوڈیشل کمیشن کے اجلاس میں 6 ججز کی تعیناتی کی منظوری دی گئی تھی۔ اس اجلاس میں جسٹس منصور علی شاہ اور جسٹس منیب اختر نے اجلاس کی کارروائی نہ روکنے پر بائیکاٹ کیا، جب کہ پی ٹی آئی چیئرمین بیرسٹر گوہر اور بیرسٹر علی ظفر نے بھی اجلاس کا بائیکاٹ کیا۔
جوڈیشل کمیشن نے بلوچستان ہائیکورٹ کے چیف جسٹس ہاشم خان کاکڑ، پشاور ہائیکورٹ کے چیف جسٹس اشتیاق ابراہیم، سندھ ہائیکورٹ کے چیف جسٹس شفیع صدیقی، اور اسلام آباد ہائیکورٹ کے چیف جسٹس عامر فاروق کے ناموں کی منظوری دی تھی۔ اس کے علاوہ سندھ ہائیکورٹ کے جسٹس صلاح الدین پنہور اور پشاور ہائیکورٹ کے جسٹس شکیل احمد کو بھی سپریم کورٹ کا جج بنانے کی منظوری دی تھی۔
