پاکستان شوبز انڈسٹری کے معروف اداکار و گلوکار علی ظفر کا کہنا ہے کہ دنیا کو نیوزی لینڈ کی وزیر اعظم جیسنڈا آرڈرن جیسے لیڈرزکی ضرورت ہے۔
باغی ٹی وی : پاکستان شوبز انڈسٹری کے معروف اداکار و گلوکار علی ظفر کا کہنا ہے کہ دنیا کو نیوزی لینڈ کی وزیر اعظم جیسنڈا آرڈرن جیسے لیڈرز کی ضرورت ہے۔ سماجی رابطے کی ویب سائٹ ٹوئٹر علی ظفر نے اپنے ٹویٹ میں جیسنڈا آرڈرن کا ایک ویڈیوکلپ شیئر کرتے ہوئے جیسنڈا آردڑن کو ٹیگ کیا۔
Respect @jacindaardern. The world needs leaders like you. #empathy #efficiency #results https://t.co/CExxrauTXc
— Ali Zafar (@AliZafarsays) June 8, 2020
علی ظفر کی طرف سے شئیر کئے گئے ویڈیو کلپ میں جیسنڈا کہتی نظر آرہی ہیں کہ دنیا بھر میں کورونا پر قابو پانے کیلئے ہرڈ امیونٹی یا اجتماعی مدافعت کا سہارا لینے کا مشورہ دیا جارہا تھا لیکن نیوزی لینڈ نے ایسا کرنے کا سوچا بھی نہیں کیونکہ ایسا سوچنا نیوزی لینڈ کے ہزاروں باشندوں کو موت کے منہ میں دھکیلنے کے مترادف ہوتا۔
یاد رہے کہ نیوزی لینڈ کی حکومت نے ملک کو کورونا سے پاک قرار دے کر پابندیوں کو ختم کرنے کا اعلان کردیا ہے، جیسنڈا آرڈرن نے گذشتہ روز ملک میں کورونا کی روک تھام کے لیے نافذ کی جانے والی پابندیوں کو سے مکمل طور پر ختم کرنے کا اعلان کیا۔
جیسنڈا کا کہنا تھا کہ نیوزی لینڈ میں کورونا کی روک تھام کے لیے 75 روز قبل سخت لاک ڈاؤن نافذ کیا گیا تھا لیکن اب وبا کے درمیان ملک میں زندگی عام معمولات کی طرح محسوس ہورہی ہے۔
وزیراعظم جیسنڈا نے اعلان کیا تھا کہ آج کابینہ کی اجازت کے بعد ملک کو لیول ون کی طرف لے جارہے ہیں جبکہ کورونا کے چیلنج سے بنردآزما ہونے کے لیے بین الاقوامی سرحدیں بند رہیں گی۔
واضح رہے کہ نیوزی لینڈ میں عالمگیر وبا کورونا کے کل 1504 کیسز سامنے آئے اور 22 ہلاکتیں ہوئیں۔
ویڈیو شئیر کرتے ہوئے گلوکار علی ظفر نے وزیراعظم جیسنڈا کی تعریف کرتے ہوئے کیپشن میں لکھا کہ وہ کورونا جیسی عالمی وبا کی صورتحال میں جیسنڈا کی جانب سے اٹھائے گئے اقدامات کے دل سے معترف ہیں۔
پاکستانی گلوکار نے جیسنڈا کو ٹیگ کرتے ہوئے لکھا کہ دنیا کو اس وقت آپ جیسے لیڈرز کی ضرورت ہے۔
