پی آئی اے کی پیرس سے پاکستان کیلئے انٹرنیشنل فلائٹ بند کرنے کی تیاریاں

قومی ایئر لائن (پی آئی اے) نے پیرس سے پاکستان اور پاکستان سے پیرس کیلئے انٹرنیشنل فلائٹ بند کرنے کی تیاریاں مکمل ہوگئیں۔فرانس سمیت گرد و نواح کے ممالک میں مقیم لاکھوں پاکستانیوں کیلئے سہولت ختم ہو جائے گی.

اطلاعات کے مطابق ہائی سیزن کی دو فلائٹ جن کے ٹکٹ فروخت ہوچکے تھے، منسوخ کردی گئیں۔ اس سلسلہ میں فرانس میں مقیم پاکستاینوں نے چیئرمین قومی احتساب بیورو (نیب) کو ایک فائل ارسال کی ہے۔فائل میں بتایا گیا کہ بیلجیئم، ہالینڈ اور فرانس میں مقیم لاکھوں پاکستانی اپنی قومی ایئرلائن کے ذریعے وطن آتے جاتے ہیں۔مگر ایک سازش اور مال بناؤ اسکیم کے تحت پیرس سے پاکستان کی فلائٹ کورونا وائرس کا جواز بناکر بند کر دی گئی۔

پی آئی اے نے فرانس میں چارٹرڈ فلائٹ کا انتظام کرکے لوگوں کو یہ سروس جاری رکھی مگر چند پی آئی اے افسران اور عملے نے اس کو بھی ناکام بنا دیا۔اوورسیز پاکستانیوں کا کہنا ہے کہ اگر نیب اس سلسلہ میں تفتیش کرے تو ہم مکمل ثبوت کے ساتھ نیب کو تمام معلومات فراہم کرنے کو تیار ہیں۔ان کا کہنا تھا کہ پی آئی اے کے فرانس میں کنٹریکٹ رکھنے والی فرم نے ہائی سیزن میں دانستہ فلائٹ منسوخ کرنے پر احتجاجی طور پر بینک روک دی ہے۔

انہوں نے مزید کہا کہ پی آئی اے کی براہ راست فلائٹ بند ہونے سے لاکھوں پاکستانیوں کو سخت پریشانی کا سامنا ہو گا جبکہ قومی ایئرلائن کو کروڑوں کا نقصان برداشت کرنا پڑے گا۔

دوسری جانب پی آئی اے حکام کا کہنا ہے کہ پی آئی اے ایمرجنسی رسپانس سینٹر 24 گھنٹے این ڈی ایم اے کے ساتھ کوآرڈینیشن کرے گا، سیلاب متاثرین کی امداد ریلیف آپریشن کیلئے ایمرجنسی رسپانس سینٹر میں دوسرے درجے کا الرٹ جاری کردیا گیا ہے۔

پی آئی اے کا کہنا ہے کہ ملک بھر میں پی آئی اے ریلیف آپریشن میں این ڈی ایم اے کے ہمراہ مل کر کام کرے گا۔ پی آئی اے ایمرجنسی رسپانس سینٹر میں ’’بلو لیول‘‘ ایمرجنسی الرٹ جاری کیا گیا۔