امریکا نے کراچی ائیرپورٹ کے نزدیک دہشت گرد حملے کی مذمت کی ہے۔
ترجمان امریکی محکمہ خارجہ میتھیو ملرنے میڈیا بریفنگ میں کہا کہ کراچی ائیرپورٹ کے قریب حملے میں جانوں کے ضیاع پر دکھ ہے۔حملے کے متاثرین سے تعزیت کا اظہار کرتے ہیں اور دہشت گرد حملے کی مذمت کرتے ہیں۔واضح رہے کہ 6 اکتوبر کی رات کراچی میں انٹرنیشنل ایئر پورٹ سگنل کے قریب دھماکا ہوا تھا جس کے نتیجے میں 2 چینی شہریوں سمیت 3 افراد ہلاک اور متعدد افراد زخمی ہوگئے تھے۔ دوسری طرف ایئرپورٹ سگنل پر دھماکے کا مقدمہ تھانہ سی ٹی ڈی میں درج کرلیا گیا۔سرکار کی مدعیت میں کراچی ایئرپورٹ سگنل پر دھماکے کا مقدمہ تھانہ سی ٹی ڈی میں درج کرلیا گیا ہے۔مقدمے میں دہشت گردی، قتل، اقدام قتل اور ایکسکلوزیو ایکٹ سمیت دیگر سنگین دفعات کو شامل کیا گیا ہے۔مقدمہ کے متن میں کہا گیا ہے کہ 11 بجے کے قریب دھماکے کی زور دار آواز سنائی دی گئی، نفری کے ہمراہ جب دھماکے کے مقام پر پہنچے تو وہاں آگ لگی ہوئی تھی۔مقدمہ متن کے مطابق واقع میں دو غیر ملکی ہلاک اور دس شہری زخمی ہوئے جب کہ ایک انسانی دھڑ بھی ملا تھا۔
