کراچی آرٹس کونسل میں ’عوامی تھیٹر فیسٹیول‘ کا آغاز کردیا گیا –
باغی ٹی وی : گذشتہ روز کراچی آرٹس کونسل میں ’عوامی تھیٹر فیسٹیول‘ کا آغاز کردیا گیا اس موقع پر صوبائی وزیر ثقافت سردار علی شاہ نے آرٹس کونسل میں منعقدہ ’’ عوامی تھیٹر فیسٹیول‘‘ کی افتتاحی تقریب سے خطاب کرتے ہوئے کہا کہ آرٹس کونسل نے پورے ملک کے فنکاروں کو یکجا کردیا،کورونا کی وجہ سے ثقافتی سرگرمیاں معطل رہیں ڈر اور خوف کی فضامیں اس طرح کے میلے تازہ ہوا کا جھونکا ہیں۔
احمد شاہ نے کہا کہ کورونا کی وبا کے پیشِ نظر ثقافتی سرگرمیاں معطل رہیں لیکن سندھ ثقافتی سرگرمیوں کے آغاز میں دیگر صوبوں پر سبقت لے گیا ہے جس کا ثبوت عوامی تھیٹر فیسٹیول کا رنگا رنگ آغاز ہے۔
اُنہوں نے کہا کہ صوبائی وزیر ثقافت کے شُکر گزار ہیں کہ وہ فیسٹیول میں شریک ہوئےعوامی تھیٹر فیسٹیول کا اعلان اس لیے کیا کہ ان فنکاروں کا اوڑھنا بچھونا ان کا گھر آرٹس کونسل ہی ہے یہ فنکار مجھ سے ہی امید رکھتے تھے کہ میں کچھ کروں گا آرٹس کونسل ان فنکاروں کی وجہ سے ہی ہے۔
اس موقع پر ہدایت کار پرویز صدیقی کا ڈرامہ خالہ خیالوں میں پیش کیا گیا فیسٹیول میں 18 ڈرامے پیش کیے جائیں گے اردو، سندھی، سرائیکی، پنجابی اور میمنی زبان میں بھی ایک ڈرامہ پیش کیاجائے گا جس میں ہمارے منجھے ہوئے فنکاروں کے بچے بھی حصہ لے رہے ہیں۔
انہوں نے کہا کہ تھیٹر کو سندھ کے دیگر شہروں میں بھی لیکر جائیں گے ۔فیسٹیول کے کامیاب انعقاد پر آرٹس کونسل کی گورننگ باڈی کا تہہ دل سے شکر گزار ہوں۔
عوامی تھیٹر فیسٹیول کا افتتاح قومی ترانہ بجا کر کیا گیا اس موقع پر ہدایت کار پرویز صدیقی کا ڈرامہ خالہ خیالوں میں پیش کیا گیا۔
واضح رہے کہ عوامی تھیٹر فیسٹیول کا انعقاد تمام ایس او پیز کے تحت کیا گیا جس میں شہریوں کی بڑی تعداد اہل خانہ کے ہمراہ شریک ہوئی۔
