واشنگٹن :کون کب اور کیوں موٹا ہوتا ہے یہ تحقیقی خبریں تو پہلے بھی آتی رہی ہیں لیکن یہ پہلی بار آیا ہے کہ کالج میں زیر تعلیم طالب علم اپنی ہم مکتب طالبات کی نسبت جلد موٹے ہوجاتے ہیں.امریکا میں کی جانے والی ایک تحقیق میں دعویٰ کیا گیا ہے کہ نوجوان خواتین کے مقابلے نوجوان مرد جلد موٹاپے کا شکار ہوجاتے ہیں۔اس دلچسپ تحقیق میں کالج میں داخلہ لینے والے مرد و خواتین میں موٹاپے کے تناسب کا جائزہ لیا گیا اور دیکھا گیا کہ کن وجوہات کی وجہ سے لوگ موٹے ہو رہے ہیں۔
امریکی ادارہ برائے سائنس جرنل ’بی ایم سی‘ میں شائع رپورٹ کے مطابق امریکی ماہرین کی جانب سے یونیورسٹی کے طلبہ میں موٹاپے کی وجہ جاننے والی تحقیق میں یہ بات سامنے آئی کہ کالج کے زمانے سے ہی مرد و خواتین موٹے ہونا شروع ہوجاتے ہیں.سائنس جرنل نے اپنی رپورٹ میں لکھا ہے کہ لڑکے اور لڑکیوں کو 100 غذاؤں اور مشروبات کی فہرست دی اور ان سے پوچھا کہ انہوں نے کس غذا یا مشروب کی کتنی مقدار استعمال کی۔ماہرین کے مطابق رضاکاروں سے پوچھے گئے سوالات کے نتائج سے پتہ چلا کہ کالج یا یونیورسٹی کے پہلے سال میں ہی لڑکے اور لڑکیوں کا وزن بڑھنا شروع ہوجاتا ہے۔
سائنس جرنل ‘بی ایم سی ‘ نے اپنی تحقیق میںکہا ہے کہ ماہرین نے لڑکیوں کے مقابلے لڑکوں کے وزن بڑھنے کے اسباب کو ناقص خوراک کا زیادہ استعمال قرار دیا۔ماہرین کا کہنا تھا کہ لڑکے کالج یا یونیورسٹی کے پہلے سال ہی جنک فوڈ اور فرائیڈ غذائیں کھانے سمیت منشیات اور شراب نوشی کا کثرت سے استعمال کرتے ہیں، جس وجہ سے ان کا وزن تیزی سے بڑھتا ہے۔
ماہرین کے مطابق اگرچہ لڑکیاں بھی مردوں جیسے ہی کھانے استعمال کرتی ہیں، تاہم وہ ان غذاؤں کا استعمال کم مقدار میں کرتی ہیں۔رپورٹ میں بتایا گیا کہ مجموعی طور پر کالج یا یونیورسٹی کے پہلے سال میں لڑکوں کا وزن ایک سال میں 7 کلو جب کہ لڑکیوں کا وزن ساڑھے تین کلو تک بڑھ جاتا ہے۔
